بلوچستان اٹی اسکول آتیان پیشن چناتا کچ نسبتاََ زیات ، وخت بسنے کہ جامعہ غاتیان سیاسی نیام تمنگ ءِ چٹفنگے، نگران بنجائی وزیر تعلیم مدد علی سندھی

کوئٹہ۔ 20 اکتوبر (اے پی پی ) نگران بنجائی وزیر تعلیم مددعلی سندھی پارینے کہ بلوچستان اٹی اسکول آتیان پیشن چناتا کچ ایلو صوبہ غاتا نسبت زیات ءِ، نگران حکومت دا بشخ اٹی جوان بنداو اس شاغک گڑاکاہک، وخت بسنے کہ جامعہ غاتیان سیاسی نیام تمنگ ءِ چٹفنگے ۔ داہیت ءِ او جمعہ نادے آ بیوٹمز یونیورسٹی کوئٹہ ٹی صوبہ نا چندی جامعہ غاتا وائس چانسلر آتون اوڑدہی و تعلیمی گچینی کن اوفتا سلاہ/سلاہ و سوج آتا بابت جاچ دیوان آن تران کرساپارے۔ داوخت آریجنل ڈائریکٹر ہائر ایجوکیشن بلوچستان پروفیسر ظہور احمد بازئی ، بیوٹمز یونیورسٹی کوئٹہ نا وائس چانسلرڈاکٹر خالد حفیظ، لورالائی یونیورسٹی نا وائس چانسلر احسان ا للہ کاکڑ، مکران یونیورسٹی ناوائس چانسلر ڈاکٹر مالک ترین، خضدار یونیورسٹی نا وائس چانسلر ڈاکٹر مقصود احمد ، سردار بہادر خان وویمن یونیورسٹی کوئٹہ نا وائس چانسلر ڈاکٹر ساجدہ نورین، نگران صوبائی وزیرخزانہ امجد رشید، بولان میڈیکل یونیورسٹی  کوئٹہ نا رجسٹرار اورنگزیب شاہ و ایلوفک ہم ساڑی ئسر۔ چیئرمین ہائیر ایجوکیشن کمیشن ڈاکٹر مختار احمد، گوادر یونیورسٹی نا وائس چانسلر ڈاکٹر عبدالرزاق صابر ، تربت یونیورسٹی نا وائس چانسلر ڈاکٹر جان محمد و لسبیلہ یونیورسٹی نا وائس چانسلر ڈاکٹر دوست محمد بلوچ ویڈیو لنک انا کمک اٹ دیوان اٹی بشخ ہلکر۔ وزیر تعلیم مددعلی سندھی پارے کہ بلوچستان نا جامعہ غاتا مالی و انتظامی ویل آتا ایسری کن کمیٹی اس جوڑکرینن داسہ ننے مستین نا است آن درسا مون آ کان  و گپ وتران نا کمک اٹ غٹ ویل آتا ایسری اس کشنگے۔ اوپارے کہ نگران وزیراعظم انوارالحق کاکڑ نا پارت آ بلوچستان نا چاردے ئی دورہ ءِ کننگ اٹی اُٹ، کوئٹہ غا بننگ نا مسخت تعلیم نا چاہندار، صوبائی حکومت و دانشور آتون اوڑدہی کرسا تعلیم نا بشخ اٹی گچینی کن سلاہ و سوج مرتب کننگ ناءِ۔ اونا پاننگ ئس کہ سندھ و بلوچستان آن پد ایلو صوبہ غاتا ہم دورہ ءِ کیوہ اوکان پد تعلیم نا بشخ اٹی مون تروک چیلنج و اوفتا ایسر نا تعلقدار تینا سلاہ و سوج آتیا تالان رپورٹ اس صدر مملکت و نگران وزیراعظم ءِ پیش کیوہ۔ اوپارے کہ تعلیم نا بشخ اٹی کوالٹی نا ویل و ایلوفتیا ٹاسک فورس اس جوڑ کرینن ہرانا کماشی ءِ ای تینٹ کیوہ، نگران حکومت تعلیم نا بشخ اٹی گچین بنداو اس شاغسا کاہک، وائس چانسلر آتون  اینو نا نشست شروعات ءِ و داچرجوئی ءِ مون آ ودفنگک۔