اسلام آباد۔ 20 اکتوبر (اے پی پی) نگران بنجائی وزیر واپار، صنعت و پیدوار ڈاکٹر گوہر اعجاز بیلٹ اینڈ روڈ انیشی ایٹیو (بی آرآئی ) ٹی چین نا اہم کڑد آ زور شاغسا پارینے کہ دا ڈٹ پاکستانی تا زند ءِ بدل کرینے، سی پیک نا بنائی ریسہ بجلی نا بندش ءِ چٹفینے و فاضل بجلی ودی کننگ اٹ آسراتی فراوان کرینے ہراڑآن صنعت کاری نا پوسکن آمزل طے مننگ ءِ۔ داخیال آتا درشانی ءِ او جمعہ نادے آ شنگھائی ٹی چینی ایگزم بینک انا صدر رین شینگجن تون اوڑدہی ٹی گپ وتران کرسا کرے۔ اوبی آر آئی نا بروک آ ریسہ ءِ مون آ تخا ہراٹی نجی بشخ آتا کمکاری آ چکار کننگانے۔ گوہر اعجاز اڑاند آتے مر کننگ و بھلاڈٹ آتے ترندی اٹ مو ن آ دننگ کن پاکستان نا خصوصی زرکاری سہولت کونسل (ایس آئی ایف سی ) نا ستاءِ کرے۔ ڈاکٹر گوہر اعجاز کراچی، لاہور، ملتان و فیصل آباد اٹی خصوصی اقتصادی زونز(ایس ای زیڈز) نا جوڑ کننگ نا پڑو ءِ کرے و پارے کہ ہراسہ ایس ای زیڈ صنعتی شونداری ءِ آسان کننگ کن پوسکن آ آسراتی تیان شپ مریک۔ چینی ایگزم بینک انا صدر رین شینگجن پارے کہ ایگزم بینک وام تا تنظیم نواکن تینا تہہ نا عمل ءِ پورو کرینے ہرا آرایم بی ٹی لین دین ءِ آسان جوڑ کیک و واپاری تعلقداری ءِ پین مو ن آ دیک۔ اونجی زرکاری ءِ مون آ دننگ کن پی سی سی نا جوڑ کننگ ءِ اسہ فائدہ مند وڑوڈول انا وڑاٹ ستا ءِ کرسا ڈاکٹر گوہر اعجاز نااونا دورہ غا منت واری ءِ ہرفے۔ بنجائی وزیر ڈاکٹر گوہر مواصلات ءِ ودفنگ اٹ سی پیک نااہمیت آ زور شاغا۔ اوپارے کہ ودوک آ صنعتی سرجزآتا نتیجہ ٹی مصنوعات آتا برآمد آتے مون آ دننگ کن، پاکستان علاقائی ملک و بلاک آتون مارکیٹ اسکان رسینگ نا معاہدہ غاتیا سرگرمی اتون گپ وتران کننگ ءِ و اوڑتون اوار دا ملک آتون ٹرانزٹ ٹریڈ نا گمان ہم ارے۔ اوڑدہی ٹی ہڑتوم آ فریق آک پاکستان و چین نا نیام اٹ اقتصادی تعلقداری تے سوگو کننگ و کمکاری ءِ ودفنگ نا عزم انا درشانیءِ کریر ، دا شریداری ہڑتوم آملک آتا شونہالی و شونداری نا ضمانتءِ۔
