اسلام آباد۔ 20 اکتوبر (اے پی پی) صدر مملکت ڈاکٹر عارف علوی پاکستانی جامعہ و رھوڈز ٹرسٹ نا نیام اٹ تعلیمی رابطہ و کمکاری ءِ پین ودفنگ نا گرج آ زور شاغسا پارینے کہ تعلیمی سفر اٹ طالب علم آتا راہشون آن اوفتا لائخی تے پورو وڑاٹ مون آ اتنگ اٹ کمک رسینگک۔ داخیال آتا درشانی ءِ او جمعہ نادے آ رھوڈز ٹرسٹ نا ڈل اتون گپ وتران کرسا کرے ہرامسکوہی چیئرمین سینیٹ وسیم سجاد ورھوڈز ٹرسٹ برطانیہ نا سی ای او الیزابیتھ کس نا کماشی ٹی اوڑتون اوڑدہی کرے۔ صدر مملکت پارے کہ پاکستانی جامعہ و رھوڈز ٹرسٹ نا نیام اٹ تعلیمی رابطہ و کمکاری ءِ پین ودفنگ نا گرج ءِ، پاکستانی جامعہ غاتے پنی آ جہانی جامعہ خاص وڑاٹ آکسفورڈ یونیورسٹی تون تعلقداری تے ودفنگ آ چکار کروئی مریک۔ اوپارے کہ رھوڈز ٹرسٹ انا کنڈآن پاکستان نا جوڑ مننگ آن پاکستانی طالب علم آتے تعلیمی وظیفہ فراوان کننگ ستاکڑزک، رھوڈز ٹرسٹ نا کنڈآن پاکستانی طالب علم آتے اوفتا تعلیمی سفر اٹ کمکاری و سلابت کننگ سفت نا قابل ءِ۔ صدر مملکت پارے کہ تعلیمی سفر اٹ طالب علم آتے سلابت تننگ آن اوفتا لائخی تے پورو وڑاٹ مون آاتنگ اٹ کمک رسینگک۔ رھوڈز ٹرسٹ نا سی ای او صدر مملکت ءِ تعلیمی بشخ و پاکستانی طالب علم آتے وظیفہ غاتا فراوانی ٹی ٹرسٹ نا کڑد انا بارواٹی پارے۔
