ارومچی۔ 20 اکتوبر (اے پی پی) نگران وزیراعظم انوارالحق کاکڑ پارینے کہ چین اتون تعلقداری پاکستان نا خارجہ پالیسی نا بنداو و علاقائی امن و شونداری نا ضامن ءِ، سنکیانگ و پاکستان ناہمسایہ علاقہ غاتا نیام اٹ واپار و زرکاری آن ہلیس دودوربیدہ ئی و الس تون الس نا تعلقداری اسکان کمکاری نا چندی بشخ آتیٹی رابطہ غاتے کڑمب کننگ نا گرج ءِ۔ جمعہ نادے آ وزیراعظم آفس نا میڈیا ونگ آن جاری بیان نا رداٹ وزیراعظم انوارالحق کاکڑ ارومچی ٹی کمیونسٹ پارٹی آف چائنہ نا پولٹ بیورو نا مرکزی ممبر و سنکیانگ ایغور وتواجہ علاقہ ناپارٹی سیکرٹری مازنگروئی تون اوڑدہی کرے۔ داوخت آ چین اتون سنگتی نا بابت پاکستان نا عزم انا درشانی ءِ کرسا وزیراعظم پارے کہ چین اتون تعلقداری پاکستان نا خارجہ پالیسی نا بنداو وعلاقائی امن و شونداری نا ضامن ءِ۔ بیجنگ اٹ صدر شی جن پنگ و وزیراعظم لی کیانگ تون تینا اوڑدہی تا ذکر ءِ کرسا وزیراعظم ہڑتوم آ ملک آتا نیام اٹ ہڑتوم آکنڈآتا تعلقداری تے پین سوگو کننگ کن چینی سرکڑدہ غاتا سوگو ذاتی عزم انا ستاءِ کرے۔ پاکستان کن سنکیانگ نا اہمیت نا درشانی ءِ کرسا وزیراعظم کاکڑ پارے کہ دا ڈیہہ پاکستان تون جغرافیائی، تاریخی و دودوربیدہ ئی تعلقداری نا سوب آن اسہ خاص ءُ اہمیت اس تخک۔ اوسنکیانگ و پاکستان نا ہمسایہ علاقہ غاتا نیام اٹ واپار و زرکاری آن ہلیس دودوربیدہ ئی و الس تون الس نا تعلقداری اسکان کمکاری نا چندی بشخ آتیٹی رابطہ غاتے کڑمب کننگ نا اہمیت آ زور شاغا۔ سنکیانگ نا دورہ ءِ کننگ آ وزیراعظم نا منت واری ءِ ہرفسا ، پارٹی نا سیکرٹری مازنگروئی پارے کہ چندی بشخ آتیٹی پاکستان و سنکیانگ تعلقداری تے کڑمب کننگ نا بے پناہ لائخی ساڑی ءِ۔ اوسنکیانگ نا کنڈآن پاکستان اٹ کاروبار و واپار نا وارخواہی پٹنگ و خنجراب سوست بارڈر کراسنگ نا کمک اٹ واپاری و الس نا نیام اٹ تعلقداری تے پین آسان کننگ کن آمادگی نا درشانی ءِ کرے۔ ہڑتوم آ فریق آک سنکیانگ و پاکستان نا ہمسایہ علاقہ غاتا نیام اٹ کمکاری نا پورو لائخی ءِ کاریم اٹ اتنگ کن اواری اٹ کاریم کننگ آ امنا کریر۔
