اورومچی۔ 20 اکتوبر (اے پی پی) نگران وزیراعظم انوارالحق کاکڑ پارینے کہ پاکستان و چین نا سنگتی نا یکتا رشتہ پت و تین پہ تینی شرف نا بنداو آ استوار ءِ، سنکیانگ بیرہ واپاری و مواصلاتی راہداری اف بلکن اِراعظیم تون تے اوار کننگ نا سوب ہم ارے، چین اٹی تعلیم دوئی کروک آ پاکستانی طالب علم آک پاکستان اٹ سیل و سوات نا مون آدننگ کن کڑد ادا کیر۔ جمعہ نادے آ سنکیانگ یونیورسٹی نا استاد و طالب علم آتیان تران کرسا نگران وزیراعظم پارے کہ پاکستان چین اتون بے مٹ تزویراتی شریداری ءِ پین ودفنگ نا عزم انا درشانی ءِ کیک، سنکیانگ بیرہ واپاری و مواصلاتی راہداری اف بلکن اِرا عظیم قوم تے اوار کننگ نا سوب ہم ارے۔ اوپارے کہ ہمسایہ مننگ تون اوارا وار اسیجائی دودوربیدہ نا سوب آن سنکیانگ پاکستانی تا است آتیٹی خاص اہمیت تخک، خنجراب بارڈر پاکستان و چین ءِ اسہ ایلوتون گنڈک، پاکستان وچین نا سنگتی نا یکتا رشتہ پت وتین پہ تینی شرف نا بنداوآٹی ءِ۔ اوپارے کہ سی پیک پوسکن آدور اٹی پترینگانے، سی پیک بی آر آئی نا رداٹ اسہ جوان ءُ ڈٹ اسے، ہڑتوم آ ملک آتا الس نا نیام اٹ رابطہ غاتیان علاقائی امن ءِ فروغ ملک، سی پیک اٹ گوادر ءِ مرکزی حیثیت دوئی ءِ، سی پیک آن صنعتی شونداری، روزگار، معدنیات و آئی ٹی ءِ مون آ دننگ ملک۔ اوپارے کہ خنجراب و سوست بارڈر واپار کن پین آسراتی تا فراوانی کن سنبرینگوک ءُ۔ داکان پد سنکیانگ یونیورسٹی ٹی طالب علم آتون اوڑدہی ٹی گپ وتران کرسا نگران وزیراعظم پارے کہ کوشست ءِ کہ زیات آن زیات پاکستانی طالب علم سنکیانگ اٹ تعلیم کیر، سیل و سوات نا مو ن آ دننگ کن ہڑتوم آ کنڈآتا گام گیج کننگک، چین بے کچ زیبا ءُ ملک و جوان انگا بندغ آتا راج ءِ، ورناک راج اسے نا شونداری ٹی اہم ءُ جزو اسے ءُ، شونداری کن زند انا مسخت ءِ متعین کروئی مریک، چینی طالب علم آک پاکستان اٹ سیل و سوات نا مون آ دننگ کن کڑد ادا کیر، تین پہ تینی شریداری وخت انا تدینگ تون اوار اوار سوگو آن سوگو مرسا ہِننگ ءِ۔
