ارومچی۔ 20 اکتوبر (اے پی پی) نگران وزیراعظم انوارالحق کاکڑ چین نا وتواجہ صوبہ سنکیانگ نا دارالحکومت ارومچی نا دورہ ٹی سنکیانگ یونیورسٹی آ ہنا، ہراڑے او اسکالر، پولکار ، تعلیم نا چاہندار، فیکلٹی باسک و طالب علم آتا اسہ بھلو مچی اسے آن تران کرے۔ یونیورسٹی آ سرمننگ آ سنکیانگ یونیورسٹی نا صدر یاؤ کیانگ و اکیڈمیا نا باسک آک وزیراعظم ءِ بخیرکریر۔ وزیراعظم تینا تران اٹی پارے کہ اونا سنکیانگ نا دورہ پاکستان و چین نا نیام اٹ پائیدار تعلقداری ٹی مزل نا ڈیک ءِ ایتک۔ او تین پہ تینی امن، شونہالی و شونداری کن پاکستان و چین نا ہروڑنا وخت وحالیت آتیٹی تزویراتی کمکاری ءِ پین سوگو کننگ کن پاکستان نا عزم انا درشانی ءِ کرے۔ نگران وزیراعظم چین پاکستان اقتصادی راہداری نا بابت سنکیانگ نا اہمیت ءِ تالان کرسا قدیم شاہراہ ریشم نا کمک اٹ سنکیانگ تون تاریخی رابطہ غاتا ذکر ءِ کرے۔ سنکیانگ و گلگت بلتستان نا نیام اٹ دودوربیدہ ئی و تاریخی رابطہ غاتا بابت ذکر ءِ کرسا وزیراعظم بنداوی پنجر نا شونداری، اقتصادی ہم گرنچی، واپار و زرکاری ، کشت وکشار، تعلیمی تبادلہ، سائنس وٹیکنالوجی و ہڑتوم آملک آتا الس نا نیام اٹ رابطہ غاتے مون آ دننگ کن سنکیانگ تون شریداری کن پاکستان نا است خواہی نا درشانی ءِ کرے۔ ہڑتوم آ ملک و الس نا نیام اٹ تعلقداری تے مون آدننگ اٹ طالب علم آتا الم کڑد ءِ تالان کرسا وزیراعظم پاکستان و چین نا ورناتیان دا اومیت نا درشانی ءِ کرے کہ او بروک آ سال تیٹی دا سنگتی و ایلمی ءِ پین سوگو کیرہ۔ داکان مست وزیراعظم ءِ یونیورسٹی نا ہسٹری میوزیم اٹی 99 سال متکن آ سنکیانگ یونیورسٹی نا تاریخ نا بارواٹی حوال ہم تننگا۔
