ارومچی۔ 20 اکتوبر (اے پی پی) نگران وزیراعظم انوارالحق کاکڑ تینا دورہ ءِ چین اٹی جمعہ نادے آ چین نا وتواجہ صوبہ سنکیانگ نا دارالحکومت ارومچی آ سرمس ہراڑے او سنکیانگ یونیورسٹی نا دورہ ءِ کرے۔ یونیورسٹی آ سرمننگ آ سنکیانگ یونیورسٹی نا صدر یاؤ کیانگ و اکیڈمیا نا باسک آک اودے بخیرکریر۔ وزیراعظم اسکالر، پولکار ، تعلیم نا چاہندار، فیکلٹی باسک و طالب علم آتا اسہ بھلو مچی اسے آن تران کرے۔ وزیراعظم پارے کہ اوناسنکیانگ نا دورہ ءِ پاکستان و چین نا نیام اٹ پائیدار تعلقداری ٹی مزل نا ڈیک ءِ ایتک ۔ اوتین پہ تینی امن، شونہالی و شونداری کن پاکستان و چین نا ہروڑنا وخت و حالیت آتیٹی تزویراتی کمکاری ءِ پین سوگو کننگ کن پاکستان نا عزم انا درشانی ءِ کرے۔ وزیراعظم چین پاکستان اقتصادی راہداری نا بابت سنکاینگ نا اہمیت ءِ تالان کرسا متکن آ شاہراہ ریشم نا کمک اٹ سنکیانگ تون تاریخی رابطہ غاتا ذکر ءِ کرے۔ سنکیانگ و گلگت بلتستان نا نیام اٹ دودوربیدہ ئی و تاریخی رابطہ غاتا بابت ذکر ءِ کرسا وزیراعظم بنداوی پنجر نا شونداری ، اقتصادی ہم گرنچی، واپار و زرکاری ، کشت وکشار، تعلیمی تبادلہ، سائنس و ٹیکنالوجی و ہڑتوم آ ملک آتا الس نا نیام اٹ رابطہ غاتے مون آدننگ کن سنکیانگ تون شریداری کن پاکستان نا است خواہی نا درشانی ءِ کرے۔ ہڑتوم آ ملک و الس نا نیام اٹ تعلقداری تے مون آ دننگ اٹ طالب علم آتا اہم کڑد ءِ تالان کرسا وزیراعظم پاکستان و چین نا ورناتتون دا اومیت نا درشانی ءِ کرے کہ اوبروک آ سال تیٹی دا سنگتی و ایلمی ءِ پین سوگو کیرہ۔ داکان مست وزیراعظم ءِ یونیورسٹی نا ہسٹری میوزیم اٹی 99 سال متکن آ سنکیانگ یونیورسٹی نا تاریخ نا بارواٹی حوال ہم تننگا۔
