کوئٹہ۔ 19 اکتوبر (اے پی پی) نگران بنجائی وزیر تعلیم و پروفیشنل ٹریننگ مددعلی سندھی پارینے کہ ملک اٹی غٹ آن زیات بلوچستان اٹی چناک اسکو ل آتیان پیشن ءُ ، پنجا سال انا ویل آتے اسہ دے اٹی ایسر کننگ کپنہ، ولے بنجائی حکومت صوبہ ٹی آب اٹ تعلیم نا مون آ دننگ کن ہرممکن گام گیج کیک ۔ داہیت ءِ او سردار بہادر خان وویمن یونیورسٹی ٹی طالب علم آتیٹی لیپ ٹاپ بشخنگ نا دود آن تران کرساپارے۔ داوخت آ پرووائس چانسلر سردار بہادر خان وویمن یونیورسٹی پروفیسر ساجدہ نورین، ڈائریکٹر جنرل نیوٹیک علی بخش مگسی، ڈائریکٹر جنرل ہائیر ایجوکیشن پروفیسر ڈاکٹر ظہور احمد بازئی ئسک ہم ساڑی ئسر۔ نگران بنجائی وزیر تعلیم مددعلی سندھی پارے کہ نن بلوچستان نا طالب علم آتا ویل آتے ایسر کننگ کن دانگیابسونن۔ مستین نا حکومت آک تعلیم آ زیات چکار کتور و نئے اوڑکن زیات فنڈ تخنگا۔ ننا کوشست ءِ کہ بلوچستان نا جامعہ غاتا ویل آتا ایسری کن سنجیدگی اٹ گام گیج کننگے۔ داوخت آ بلوچستان اٹی غٹ آن زیات چناک اسکول آتیان پیشن ءُ۔ دُن تو 18 ممی ترمیم آن پد تعلیم نا بشخ صوبہ ءِ ملا ولے اوکان پد ہم بنجائی حکومت صوبہ ٹی آب اٹ تعلیم نا مون آ دننگ ءِ پک کننگ نا بابت تینا زمواری تے پورو کیک۔ اوپارے کہ نن قول کینہ کہ غٹ صوبہ غاتیکن اسہ ہندن ءُ تعلیمی پالیسی اس جوڑ کین ہرا بروک آ حکومت آتیکن کسر نا ڈیوا مرے۔ اوپارے کہ 50 سال انا ویل آتے اسہ دے اٹی ایسر کننگ مفک ولے اوفتے ٹی کمتی اتنگ مریک۔ ہراتم اسکان طالب علم آتے تعلیم نا آب اٹ وارخواہی فراوان کننگپک اوفتے کن عملی پڑاٹ کاریم کننگ مشکل مریک۔ اوپارے کہ صوبہ ٹی تعلیم ءِ زیات آن زیات مون آ دننگ کن بنجائی حکومت ہرممکن کمک فراوان کیک۔ اوپارے کہ سردار بہادر خان وویمن یونیورسٹی نا خضدار و پشین کیمپس آتیکن 50 کروڑ روپئی جاری کننگانے ہراڑان یونیورسٹی ٹی آب اٹ تعلیم اٹ پین گچینی بریک۔ دود انا ایسر اٹ نگران بنجائی وزیر تعلیم طالب علم آتیٹی لیپ ٹاپ بشخا۔
