بیجنگ۔ 19 اکتوبر (اے پی پی) نگراں وزیراعظم انوارالحق کاکڑ وچین نا کمیونسٹ پارٹی نا پولٹ بیورو نا قائمہ کمیٹی نا باسک و سی پی سی نا مرکزی کمیشن ڈسپلن انسپیکشن نا سیکرٹری لی شی ہڑتوم آ ملک آتا نیام اٹ سیاسی و اقتصادی تعلقداری نا مون آ دننگ، اقتصادی کمکاری خاص وڑاٹ سی پیک آ پبی وڑاٹ کاریم کننگ آ امنا کرینو۔ چارشنبے نادے آ وزیراعظم میڈیا آفس آن جاری بیان نا رداٹ نگران وزیراعظم انوارالحق کاکڑ نا چین انا کمیونسٹ پارٹی نا پولٹ بیورو نا قائمہ کمیٹی نا باسک و سی پی سی نا مرکزی کمیشن ڈسپلن انسپیکشن نا سیکرٹری لی شی تون اینو چارشنبے آ بیجنگ اٹی اوڑدہی مس۔ وزیراعظم لی شی ءِ چین نا کنڈآن مسٹ میکو بیلٹ اینڈ روڈ فورم نا شاندار اڈتننگ آ مبارکبادی تس و اودے پولٹ بیورو قائمہ کمیٹی نا باسک گچین مننگ آ ہم مبارکبادی تس۔ ہڑتوم آ راہشونک پاکستان وچین نا نیام اٹ سیاسی و اقتصادی تعلقداری تے ودفنگ نا عزم انا درشانی ءِ کریر و ہڑتوم آملک آتا اہم امور آ بلامشروط کمکاری آ امنا کریر۔ اواقتصادی کمکاری خاص وڑاٹ چین پاکستان اقتصادی راہداری نا تفنگ آ پوسکن جوش و جوزہ اٹ پبی چکار کننگ آ ہم امنا کریر۔ اوڑدہی ٹی چین نا پاکستان اٹ زرکاری نا کچ ءِ ودفنگ کن گام گیج آتیا گپ وتران کننگا۔ دا بشخ آتیٹی انفارمیشن وکمیونیکیشن ٹیکنالوجی، کانڑ کنی و معدنیات ، انفراسٹرکچر و کشت وکشار نا بشخ آتیٹی زرکاری ٹی ودکی اتون اوار اوار صنعتی کمکاری و خصوصی اقتصادی زون تا تفنگ اوار ءِ۔
