بیجنگ۔ 19 اکتوبر (اے پی پی) نگراں وزیراعظم انوارالحق کاکڑ بیلٹ اینڈ روڈ انیشی ایٹیو نا پبی مخ تفی نا درشانی ءِ کرسا پارینے کہ پاکستان سی پیک نا بڑزکو آب انا شونداری نا پوسکن آ ریسہ ٹی چین اتون چندی بشخ آتیٹی رابطہ و کمکاری ءِ سوگو کیک، غذائی رکھ و کشت وکشار کون آ بشخ آتیٹی پوسکن آ ٹیکنالوجی اس درستی راستی کرفنگک۔ نیزگاری نا چٹفنگ، پٹ وپول و شونداری، انفارمیشن ٹیکنالوجی و ایلو بشخ آتیٹی چین نا سرسہبی تیان فائدہ ہرفک، چینی کاروباری ادارہ غاتا زرکاری نا است بڈی کن پاکستان خصوصی سرمایہ کاری سہولت کونسل ءِ پین گچین کننگک۔ اوداخیال آتا درشانی ءِ تدوک آ دے داڑے چینی میڈیا تون گپ وتران کرساکرے۔ وزیراعظم پارے کہ پاکستان چین نا صدر شی جن پنگ نا بیلٹ اینڈ روڈ انیشی ایٹیو( بی آرآئی) نا ستاءِ کیک و دانا پبی مخ تفی ءِ کیک، پاکستان چین انا شونداری نا آزموندہ غان فائدہ ہرفنگ نا خواہندار ءِ۔ وزیراعظم پارے کہ پاکستان بی آرآئی نا عظیم وژن ءِ قدر انا نظر اٹ ہرک ہرا اقتصادی شونداری نا کمک اٹ امن و شونہالی اتنگ نا درشانی ءِ۔ پاکستانی ڈل ہراٹی اقتصادی، صنعتی، سیکورٹی و ایلو بشخ آتا بڑزکو کمامدارآک اوار ءُ ، دورہ ٹی چینی کمامدارآک، تھنک ٹینکس و میڈیا تون ہڑتوم آکنڈآتا گپ وتران نا چاری ئس۔ بی آر آئی نا رداٹ چین پاکستان اقتصادی راہداری (سی پیک ) نا بے مٹ ڈٹ انا اہمیت آ زور شاغسا وزیراعظم پارے ک سی پیک آن بھلو شونداری اس مسنے و اونا آبائی صوبہ بلوچستان کن شونداری نا روشنا گمان ودی مسنے۔
