بیجنگ۔ 19 اکتوبر (اے پی پی) نگران وزیراعظم انوارالحق کاکڑ و چین نا وزیراعظم لی کی چیانگ ہڑتوم آ کنڈآتا تعلقداری تے پین سوگو کننگ نا عزم انا درشانی ءِ کرسا سیاسی، اقتصادی، تعلیم، سائنس و ٹیکنالوجی، دودوربیدہ ئی و السی رابطہ غاتے ودفنگ آ منا کرینو۔ دا امنائی سلاہ چارشنبے نادے آ داڑے بیجنگ اٹی مسٹ میکو بیلٹ اینڈ روڈ فورم نا وخت آ ہڑتوم آ راہشون تا اوڑدہی مس۔ داوخت آ نگران بنجائی کابینہ نا باسک آک و بڑزکو کمامدارآک ساڑی ئسر۔ ہڑتوم آ راہشونک سوگو و متکن آ پاک چین تعلقداری تا ذکر ءِ کرسا تین پہ تینی تعلقداری تے پین مون آ دننگ نا عزم انا درشانی ءِ کریر۔ ہڑتوم آ راہشونک سیاسی، اقتصادی، شعبہ تعلیم، سائنس و ٹیکنالوجی، دودوربیدہ ئی و الس نا کہول آ تعلقداری تے ودفنگ آ امنا کریر۔ وزیراعظم چینی سرکڑدہ غاتے مسٹ میکو بیلٹ اینڈ روڈ فورم ( بی آر ایف) نا شاندار اڈتننگ آ مبارکبادی پیش کرے۔ بیلٹ اینڈ روڈ ڈٹ انا وسعت نا ذکر ءِ کرسا وزیراعظم پارے کہ دا ڈٹ مواصلاتی رابطہ و اسیجائی شونہالی نا سوب آن مچ آ دنیا کن بھاز اہمیت تخک۔ ہڑتوم آ راہشونک چین پاکستان اقتصادی راہداری (سی پیک) نا رداٹ پاک چین کمکاری و زرگزرانی رابطہ غاتا مون آ دننگ نا کچ آ گپ وتران کریر۔ وزیراعظم انوارالحق کاکڑ چین پاکستان اقتصادی راہداری نا پاکستان نا زرگزران کن اہمیت نا ذکر ءِ کرسا پارے کہ سی پیک تینا تفنگ نا پوسکن آ دور اٹی پترینگانے ہراٹی صنعتی شونداری ،روزگار نا فراوانی نا ڈٹ ، معدنیات ، آئی ٹی و کشت وکشار نا شونداری اوار ءِ۔
