بیجنگ۔ 19 اکتوبر (اے پی پی) نگراں وزیراعظم انوارالحق کاکڑ سی پیک ءِ پاک چین سنگتی کن مزل نا نشان گوندساپارینے کہ پاکستان اٹ تدوک آ دہ سال اٹی سی پیک نا بھرمک زرگزرانی شونداری نا دروشم اٹ مون آ بسنو، سی پیک آن پاکستان نا زرگزرانی شونداری و شونہالی تون اوار اوار ڈیہہ اٹی مواصلاتی رابطہ ءِ مون آدننگک۔ اوداخیال آتا درشانی ءِ پنچ شنبے نادے آ داڑے چائنا ڈویلپمنٹ کوآپریشن ایجنسی (سڈکا) نا چیئرمین لؤزائوہوئی تون اوڑدہی ٹی کرے۔ وزیراعظم سی پیک نا شریداری و رابطہ غاتے ودفنگ نا وژن نا ستاءِ کرسا پارے کہ اونا بھرمک تدوک آ دہ سال اٹی پاکستان نا زرگزرانی شونداری ٹی دروشم اٹ دوئی مس۔ وزیراعظم پارے کہ سی پیک پاک چین سنگتی نا تاریخ اٹ اسہ مزل نا حیثیت تخک ہراڑان نئے بیرہ پاکستان اٹ زرگزرانی شونداری و شونہالی مریک بلکن ڈیہہ اٹی مواصلاتی رابطہ و جم شونداری ءِ مون آ دننگ ملک۔ وزیراعظم انوار الحق کاکڑ و لؤ زائوہوئی چین و پاکستان نا نیام اٹ سی پیک نا رداٹ کشت وکشار، جان جوڑی، تعلیم، کسبی تربیت، ساف دیر انا فراوانی و نیزگاری نا چٹفنگ نا بابت کمکاری آ گپ وتران کریر۔ لؤ زائوہوئی چین نا گلوبل ڈویلپمنٹ انیشی ایٹیو آ عملدرآمد ءِ ترند کننگ کن وزیراعظم نا سلاہ نا ستاءِ کرے۔ وزیراعظم پاکستان و سڈکا نا نیام اٹ شریداری خاص وڑاٹ اونا رداٹ پاکستان اٹ برجا شونداری ڈٹ آتا ستاءِ کرے۔ چیئرمین سڈکا لؤزائوہوئی وزیراعظم ءِ تینا ادارہ نا کنڈآن سی پیک نا مریس مدتی ڈٹ آتا پوروی ٹی کمک ءِ برجاتخنگ نا باوری کرفے۔
