بیجنگ۔ 19 اکتوبر (اے پی پی) نگران وزیراعظم انوارالحق کاکڑ چین وپاکستان نا الس نا نیام اٹ خیرخواہی نا جوزہ غاتے پاک چین متکن آ سنگتی و اسٹریٹجک شریداری نا مرکزی عنصر گوندسا پارینے کہ ہڑتوم آ ملک آتا نیام اٹ رابطہ ءِ ودفنگ آن نسل درنسل سنگتی ءِ مون آ دننگک۔ نگران وزیراعظم انوارالحق کاکڑ تون چین نا کمیونسٹ پارٹی نا مرکزی کمیٹی نا جہانی ڈیپارٹمنٹ نا وزیر لیوجیان چاؤ پنچ شنبے نادے آ داڑے اوڑدہی کرے۔ وزیراعظم پاکستان و چین نا نیام اٹ متکن آ تاریخی تعلقداری تا ذکر ءِ کرسا چین نا کمیونسٹ پارٹی نا پاک چین تعلقداری و تین پہ تینی ہم گرنچی ءِ ودفنگ اٹ کڑد انا ستاءِ کرے۔ وزیراعظم چین نا شونداری ٹی کمیونسٹ پارٹی نا اہم کڑد انا ہم ستا ءِ کرے۔ وزیراعظم پارے کہ چین و پاکستان نا الس نا نیام اٹ ساڑی خیرخواہی نا جوزہ غاتے پاک چین متکن آ سنگتی و اسٹریٹجک شریداری نا مرکزی عنصر ءِ۔ وزیراعظم انوارالحق کاکڑ و لیوجیان چاؤ الس، کانود ساز اسمبلی، سیاسی پارٹی ، اسکالر، میڈیا ، ورنا ، زالبول و تھنک ٹینکس نا نیام اٹ رابطہ غاتا مون آ دننگ آ گپ وتران کرے۔ دارابطہ پاکستان و چین نا نیام اٹ نسل درنسل سنگتی نا مون آ دننگ ءِ پک کیک۔ لیوجیان چاؤ پارے کہ وزیراعظم نا دورہ ءِ چین، پاکستان و چین نا نیام اٹ خصوصی سنگتی نا روایت آتا ڈیک ءِ۔ اوچینی کمیونسٹ پارٹی نا پاکستان و چین نا تعلقداری نا سوگوی ٹی کڑد ءِ برجاتخنگ نا عزم انا درشانی ءِ کرے۔
