بیجنگ۔ 19 اکتوبر (اے پی پی) نگران وزیراعظم انوارالحق کاکڑ پارینے کہ پاکستان اٹی زرکاری نا عمل ءِ آسان کننگ کن خصوصی زرکاری آسراتی کونسل ءِ جوڑ کننگانے و حکومت زرکارآتے ہرممکن آسراتی فراوان کیک۔ داخیال آتا درشانی ءِ او دوورہ ءِ چین اٹی مِن میٹلز نا چیئرمین وینگ ژولیانگ و میٹالر جیکل کوآپریشن آف چائنا نا چیئرمین چن جیانوانگ تون گپ وتران کرسا کرے ہرا پنچ شنبے نادے آ داڑے اوڑتون اوڑدہی کرے۔ اوڑدہی ٹی پاکستان اٹی کانڑ کنی و معدنیات نا بشخ اٹی زرکاری نا بابت گپ وتران کننگا۔ ہڑتوم آ کمپنیک پاکستان اٹ زرکاری ٹی بھاز است خواہی نا درشانی ءِ کریر۔ وزیراعظم بشخ ہلوک آتے حکومت نا کاروبار دوست پالیسی تا بارواٹی معلومدار کرے۔ وزیراعظم بشخ ہلوک آتے خصوصی زرکاری سہولت کونسل نا بارواٹی ہم معلومدار کرے و پارے کہ حکومت ’’ہول آف دی گورنمنٹ اپروچ‘‘ نا رداٹ پاکستان اٹی زرکاری نا مون آدننگ کن گام گیج کننگ اٹی ءِ۔
