اسلام آباد۔ 18 اکتوبر (اے پی پی) نگران بنجائی وزیر داخلہ سرفراز احمد بگٹی غزہ ٹی ہسپتال آ اسرائیل نا وحشیانہ بمباری نا ترندی اٹ مذمت ءِ کرسا پارینے کہ ہسپتال اٹی ٹھپی، ناجوڑ و پناہ گزین آتیا جلہو غیرانسانی کاریم اسے، جہانی برادری غزہ غا اسرائیلی بمباری و گھیڑ انا چٹفنگ کن دمدستی گام گیج کے۔ چارشنبے نادے آ تینا بیان اٹی نگران وزیرداخلہ سرفراز احمد بگٹی اسرائیلی جلہو اٹی 500 آن زیات شہیدی تیا ڈکھیائی و است ہسونی نا درشانی ءِ کرے و پارے کہ ہسپتال و طبی عملہ ءِ جہانی انسانی کانود نا رداٹ رکھ دوئی ءِ، سویلین آبادی وملکیت آتے شست کننگ جہانی کانود ناخلاف ورزی و جنگی ڈوہ اسے۔ اوپارے کہ مچ آپاکستانی قوم انا است مظلوم فلسطینی تتون سرک۔ اوپارے کہ ساڑی آ اسرائیلی فضائی جلہو فلسطینی تا نسل کشی نا مترادف ءِ۔ غزہ ٹی خور و دوائی تا فراوانی نا دمدستی موکل تننگے۔
