اسلام آباد۔ 18 اکتوبر (اے پی پی) اسپیکر قومی اسمبلی راجہ پرویز اشرف غزہ نا ہسپتال آ اسرائیل نا کنڈآن بمباری نا ترندی اٹ مذمت ءِ کرسا بمباری نا نتیجہ ٹی 500آن زیات کودک شاری تا شہیدی آ ڈکھیائی و غم انا درشانی ءِ کرینے۔ چارشنبے نادے آ تینا اسہ مذمتی بیان اسے ٹی اوپارےکہ اسرائیل طاقت نا نشہ ٹی فلسطینی تا نسل کشی نا چرجوئی ءِ دمدستی وڑاٹ بند کے، پاکستان نا پارلیمان و الس جہانی برادری آن پرزور خواست کیرہ کہ دمدستی نیام تمسا اسرائیل ءِ داوڑنا ظالمانہ و وحشیانہ گام گیج آتیان توننگے۔ اوپارے کہ اسرائیل طاقت نا نشہ ٹی انسانیت سوز ظلم و جنگی ڈوہ انا مرتکب مننگ ءِ، اسرائیل نا غزہ نا ہسپتال آ جلہو ناقابل قبول ءِ۔ اسپیکر قومی اسمبلی پارے کہ کودک چنا، زالبول و بزرگ آتیااسرائیل نا کنڈآن بمباری غیرانسانی و غیرکانودی ءِ، فلسطین اٹ اسرائیلی فورس آتا کنڈآن جاری بمباری آن ہزار آ کودک شاری شست مسنو۔ اوپارے کہ اسرائیل دمدستی وڑاٹ غزہ نا ناکہ بندی ءِ چٹفسا خور و دوائی تا فراوانی ءِ پک کے، پاکستان نا کنڈآن فلسطینی ایڑھ ایلم تیکن امداد نا پڑو ہراٹی راشن و ضروریات زند انا گڑاک ءُ ستاکڑزک۔ اودعاکرے کہ اللہ تعالیٰ فلسطینی شہید آتا درجہ غاتے بڑز کے و ٹھپی تے زوت جان جوڑی و تندرستی عطاکے۔
