اسلام آباد۔ 18 اکتوبر (اے پی پی) وزیرخارجہ جلیل عباس جیلانی غزہ نا الاہلی باپسٹ ہسپتال آ اسرائیلی جلہو آ سخت ردعمل نا درشانی ءِ کرسا پارینے کہ دا ہیت بھاز پیدوار ءِ کہ اسرائیل نا کنڈآن غزہ ٹی ہسپتال آ گندہ انگا جلہو تینا دفاع نا عمل اف۔ چارشنبے نادے آ اسہ ٹویٹ اسے ٹی اوپارے کہ دا جلہو جہانی انسانی کانود نا خلاف ورزی ءِ، ہراٹی کودک چنا، زالبول، ڈاکٹر، طبی عملہ و پناہ نا پٹوک بے اُرا شاری تے شست کننگانے۔ داہیت قابل ذکر ءِ کہ وزیرخارجہ جلیل عباس جیلانی او آئی سی نا ایگزیکٹیو کمیٹی نا بھلا دیوان اٹی بشخ ہلنگ کن سعودی عرب نا شارجدہ ٹی ءِ ہرانا مسخت غزہ نا تنکی و ہموجاگہ نا محصور شاری تا انسانی حالیت آتا جاچ ِ ءِ ہلنگ ءِ۔ دا دیوان پاکستان و سعودی عرب اسیجائی وڑاٹ بٹنگانے۔ داکان مست وزیرخارجہ اوآئی سی ملک آتا تینا ہم منصب ہراٹی مصر، ایران، ترکیہ و متحدہ عرب امارات نا وزراء خارجہ غاک اوار ءُ، تون ٹیل فون آ گپ وتران کریسس۔
