بیجنگ۔ 18 اکتوبر (اے پی پی) نگران وزیراعظم انوارالحق کاکڑ پارینے کہ بیلٹ اینڈ روڈ انیشی ایٹیو( بی آرآئی) شونداری و شونہالی و ڈیہہ اکن گم چینجر ڈٹ اسے، سی پیک بی آرآئی نا فلیگ شپ ڈٹ اسے، پاکستان اٹ سی پیک اٹ ایلو ملک و شریدار آتے بخیر اٹ پانہ، دنیا ءِ چاگڑدی بدلی ، غذائی رکھ و دین تا چیلنج مون تروک ءِ، اسیجائی شونداری و شونہالی نا ڈٹ آتیٹی ہی انسانیت نا آسودہی ءِ۔ چارشنبے نادے آ مسٹ میکو بیلٹ اینڈ روڈ انا بڑزکو کہول فورم آن تران کرسا اوپارے کہ بی آر آئی فورم اٹ بشخ ہلنگ آ بے حد خوشی ءِ۔ بیلٹ اینڈ روڈ نا تصور آ صدر شی ءِ مبارکبادی پیش کیوہ، بی آرآئی شونداری و شونہالی نا ڈٹ ءِ، بی آر آئی و سی پیک ءِ دہ سال پورو مسنے۔ السی کہول آ رابطہ و زرگزرانی شونداری ءِ بی آر آئی آن مون آدننگانے۔ اوپارے کہ مربوط رابطہ الس نا شونہالی نا سوب جوڑ مریک۔ اوپارے کہ چین نا شونداری ماڈل آتیان بے حد زہمی ءِ، دنیا ہرا چاگڑدی بدلی، غذائی رکھ و دین تا چیلنج مون تروک ءِ۔ ٹرانسپورٹیشن ، توانائی و ڈیجیٹل پرخ انا چٹفنگ کن جہانی زرکاری المی ءِ۔ اوپارے کہ 2013ٹی پاکستان اٹی بی آرآئی نا فلیگ شپ ڈٹ سی پیک نا بنامس۔ سی پیک نا رداٹ 25 ارب ڈالر نا 50 ڈٹ پورو مسنے، سی پیک ڈٹ آتیان پاکستان اٹ 8 ہزار میگاواٹ بجلی ودی مننگ ءِ و دہ ہزار میگاواٹ نا ڈٹ پوروی ٹی ءُ۔ اوپارے کہ گوادر اٹی جہانی ایئرپورٹ زوت فعال مریک۔ مربوط مواصلاتی رابطہ غاتا کمک اٹ کشت وکشار و صنعت شون ہلیک۔ اوپارے کہ کروڑ آ مخلوق ءِ نیزگاری آن کشنگ آ چینی سرکڑدہ غاک خراج تحسین نا حقدار ءُ۔ پاکستان سی پیک اٹ ایلو ملک و شریدار آتے بخیر اٹ پاہک۔
