اسلام آباد۔ 18 اکتوبر (اے پی پی) نگران وزیراعظم انوارالحق کاکڑ پارینے کہ غزہ نا الاہلی الممدنی ہسپتال آ اسرائیل نا وحشیانہ جلہو اٹی کودک شاری تا لس خون غیرانسانی و ناقابل دفاع ءِ، دا جہانی کانود و انسانی حق انا بھلا خلاف ورزی ءِ۔ تینا ٹویٹ اٹی نگران وزیراعظم پارے کہ اسرائیل ءِ اونا جنگی ڈوہ اکن جوابدہ مرے انتئے کہ او غزہ غا تینا بے دریغ بمباری و گھیڑ ءِ برجاتخانے ہرانا نتیجہ ٹی زوال، بھسکاری و ہمپ و بٹ مسنے۔ اوپارے کہ اسرائیلی کوزہ نا مخ تف آتے تینا پالیسی آ نظرثانی کننگ نا گرج ءِ ہرا غزہ نا مخلوق نا برخلاف دہشت گردی نا مہم اس چلیفنگ اٹ اسرائیلی کمامدارآتے استثنا فراوان کیک۔ نگران وزیراعظم غزہ نا الاہلی الممدنی ہسپتال آ اسرائیلی جلہو نا ترندی اٹ مذمت ءِ کرے ہراٹی بھلو کچ اسے ٹی شاری تا مرک مس۔ اوپارے کہ ہسپتال آتے شست کننگ غیرانسانی ءُ کاریم اسے۔ جہانی انسانی کانود ہسپتال و طبی عملہ ءِ رکھ فراوان کیک۔ نگران وزیراعظم پارے کہ نن دا بلاامتیاز لس خون نا چٹفنگ نا خواست ءِ کینہ و جہانی برادری آ زور شاغنہ کہ او بیدادی ءِ توننگ کن ترندی اٹ کاریم کے و زموا ر آتا احتساب ءِ کے۔ اوپارے کہ منہ وخت مست اقوام متحدہ نا سیکرٹری جنرل تون تینا گپ وتران اٹی ای اوڑازور شاغاسٹ کہ جہانی برادری اسرائیل ءِ پائے کہ او بے گناہ فلسطینی تا لس خون ءِ بندکے۔
