نگران وزیراعظم انوارالحق کاکڑ نا غزہ ٹی ہسپتال آ اسرائیلی جلہو نا مذمت

اسلام آباد۔ 18 اکتوبر (اے پی پی) نگران وزیراعظم انوارالحق کاکڑ غزہ ٹی ہسپتال آ اسرائیلی جلہو نا ترندی اٹ مذمت ءِ کرسا جہانی برادری آ زور شاغانے کہ او اسرائیل ءِ بے گناہ فلسطینی تا کشت و خون آن تورے۔ چارشنبے نادے آ تینا ٹویٹ اٹی نگران وزیراعظم غزہ نا الاہلی ہسپتال آ اسرائیلی جلہو نا ترندی اٹ مذمت  ءِ کرے ہراٹی بھلو کچ اسے ٹی شاری تا مرک مس۔ اوپارے کہ ہسپتال آتے شست کننگ غیرانسانی ءُ فعل اسے۔ جہانی انسانی کانود ہسپتال و طبی عملہ ءِ رکھ فراوان کیک۔ نگران وزیراعظم پارے کہ نن دا بلاامتیاز کشت وخون نا چٹفنگ ناخواست ءِ کینہ و جہانی برادری آ زور شاغنہ کہ او بیدادی ءِ توننگ کن ترندی اٹ کاریم کے  و زموار آتا احتساب ءِ کے۔ اوپارے کہ منہ وخت مست اقوام متحدہ نا سیکرٹری جنرل تون تینا گپ وتران اٹی ای اوڑا زور شاغاسٹ کہ جہانی برادری اسرائیل ءِ پائے کہ او بے گناہ فلسطینی تا کشت وخون ءِ بندکے۔