نواز شریف وونٹ انا عزت ءِ بحال کرسا چارمیکو وار وزیراعظم مریک، خواجہ آصف نا ورکرز کنونشن آن تران

سیالکوٹ۔ 17 اکتوبر (اے پی پی) پاکستان مسلم لیگ (ن) خواجہ محمدآصف پارینے کہ غٹ کارندہ غاک 21 اکتوبر آ قائد نا بخیر کننگ کن لاہور آ سرمریر۔ مسکوہی وزیراعظم محمد نواز شریف وونٹ انا عزت ءِ بحال کرسا چارمیکو وار وزیراعظم جوڑ مریک، 2018 نا گچین کاری تیٹی وونٹ انا عزت ءِ لتاڑنگا ولے داسہ نواز شریف وزیراعظم جوڑ مرسا ووٹ انا عزت ءِ بحال کیک۔ داخیال آتا درشانی ءِ او تدوک آ نن داڑے یونین کونسل رنگ پورہ نا کنڈآن اڈہلوک ورکرز کنونشن آن تران کرساکرے۔ اوپارے کہ نواز شریف ہراتم کہ بس او ملکی زرگزران ءِ سوگو کرے۔ اوپارے کہ اسہ بدعنوان حکومت اس ہرا تدوک آ چار سال ملک و قوم آ مسلط ئس او دُز درگہ غان اقتدارا ٹی بس اودے جمہوری وڑاٹ اینک کننگا، ولدا شہباز شریف ہراحکومت ءِ کرے اونا ای گواہ اُٹ، دا دور ءِ اقتدار اٹ ہندن لگاکہ کہ اینو حکومت ہنا کہ پگہ ہنا۔ ولے اوکان پد ہم داخہ جماعت ءِ اوار درسا شہباز شریف نا ہی کاریم ئس۔ خواجہ آصف پارے کہ دُن تو کبینی ترند ءِ ولے نن سنبرینگوک اُن کہ ملک ءِ تہاری تیان کشنگ اٹ ضرور سرسہب مرینہ، نواز شریف پدی برسا کبینی ٹی کمتی کیک و کرار کرار آ گچینی بریک۔ نواز شریف دا ملک بجلی نا لوڈشیڈنگ و دہشت گردی ءِ چٹفے۔ کنے پکا یقین ءِ کہ ملکی شونداری و شونہالی نا ہرا سفر نا بناءِ اوکریسس ، اونا کماشی ءِ نواز شریف دُوارہ سنبھالک و اومزل آ ضرور سرمریک۔