بیجنگ۔ 17 اکتوبر (اے پی پی) نگران وزیراعظم انوارالحق کاکڑ دورہ ءِ چین اکن بیجنگ آ سرمس۔ بیجنگ آ سرمننگ ا اودے جم وجوش اٹ بخیر کننگا۔ چین نا وزیر سائنس و ٹیکنالوجی وانگ ژوگانگ ، پاکستان اٹ چین نا سفیر جیانگ ژی ڈونگ و بڑزکو کمامدارآک اودے بخیرکریر۔ چین نا فنکار آک روایتی رقص اتون وزیراعظم ءِ بخیرکرے۔ وزیراعظم ءِ پھل آتا گل دستہ اس پیش کننگا۔ پاکستان و چین نا قومی ترانہ ءِ خلنگا۔ وزیراعظم تینا دورہ ءِ چین اٹی 17 و 18 اکتوبرآ اڈہلوک آ مسٹ میکو بیلٹ اینڈ روڈ فورم (بی آر ایف) جہانی کمکاری ٹی بشخ ہلیک۔ بیلٹ اینڈ روڈ فورم اٹ پاکستان نا نمائندگی ءِ کرسا وزیراعظم چین پاکستان اقتصادی راہداری (سی پیک) نا رداٹ تدوک آ سال تیٹی مروک آ شونداری سرسہبی تتون اوار اوار آخبت نا ہدف و دااہم ڈٹ آ پاکستان نا پبی کمکاری نا درشانی ءِ کیک۔ وزیراعظم بی آر ایف نا بنائی دود اٹی بشخ ہلنگ آن 18 اکتوبر آ جہانی زرگزران اٹ مواصلاتی رابطہ غاتا سرحال آاڈہلوک بڑزکوکہولی فورم آن تران کیک۔
