سی پیک نا بابت قومی امنائی سلاہ ساڑی ءِ، نگران بنجائی وزیر حوالکاری مرتضیٰ سولنگی نا پی ٹی وی نا پروگرام اٹی گپ وتران

اسلام آباد۔ 17 اکتوبر (اے پی پی) نگران بنجائی وزیر حوالکاری و شینکاری مرتضیٰ سولنگی پارینے کہ سی پیک نا بابت قومی امنائی سلاہ ساڑی ءِ، سی پیک بیلٹ اینڈ روڈ انیشیٹیو نا اہم ءُ ڈٹ اسے نن دادے مون آ دننگ خوانہ، نن تینے دنیانا رفتار تون ہم گرنچ کننگ آن بیدس مون آ ہِننگ کپنہ، وزیراعظم نا دورہ ءِ چین نا مثبت و دوررس اثرمرتب مریک ، پیٹرولیم مصنوعات آتا نہاد آتیٹی کمتی نا فائدہ الس ءِ بایدے رسینگے، صوبائی و ضلعی انتظامیہ داہیت ءِ پک کیرہ کہ ہراکچ اٹ پیٹرول و ڈیزل نا نہاد آتیٹی کمتی مسنے ہمو کچ اٹ ایلو المی آ گڑاتا نہاد آک ہم کم مریر۔ دوشنبے نادے آ پی ٹی وی نا پروگرام اٹی گپ وتران کرسا نگران بنجائی وزیر حوالکاری پارے کہ نگران حکومت نا گونڈ و چنکو مد اس مریک ننا کوشست ءِ کہ ننا فوکس زرگزرانی سوگوی آٹے، تدوک آ حکومت و پارلیمان زرگزرانی سوگوی کن ہرافیصلہ غاتے کریر، نن اوفتیا عملدرآمد کننگ اُن۔ اوپارے کہ سی پیک نا بابت قومی امنائی سلاہ ساڑی ءِ، سی پیک بیلٹ اینڈ روڈ انیشی ایٹیو نا اہم ءُ ڈٹ اسے، نن دادے مون آ دننگ خوانہ،۔ اوپارے کہ نگران وزیراعظم نا دورہ ءِ چین اٹی روس و چین نا صدر آتون اوار اہم راہشون آتون اوڑدہی مریک وخت اس کہ انفراسٹرکچر ، اسپیشل اکنامک زون، ایم ایل ون تون اوار ایلو بشخ آتا بابت اہم فیصلہ مریک۔ اوپارے کہ وزیراعظم نا دورہ ءِ چین نا مثبت و دوررس اثرمرتب مریک۔ اسہ سوج اسے آ اوپارے کہ نن دا ملک ءِ زرگزرانی اعتبار اٹ مون آ دننگ نا کوشست کننگ اُن۔ اوپارے کہ دنیا ترندی اٹ بدل مننگ ءِ، دنیا نا تہہ ٹی بھلا جھیڑہ غاتا بابت تقسیم ءِ ، نگران وزیراعظم نا دورہ ءِ چین اٹی اہم اوڑدہی تیٹی دا بھلا ویل آتیا ہم گپ وتران مریک۔