نگران وزیراعظم انوارالحق کاکڑ و کینیا نا صدر ڈاکٹر ولیم روٹو نا اوڑدہی

بیجنگ۔ 17 اکتوبر (اے پی پی) نگران وزیراعظم انوارالحق کاکڑ و کینیا نا صدر ڈاکٹر ولیم روٹو واپار، زرکاری ، تعلیم و مخلوق نا رابطہ غاتا بابت ہڑتوم آ ملک آتا نیام اٹ کمکاری ءِ ودفنگ آ امنا کرینے۔ وزیراعظم آفس نا میڈیا ونگ آن جاری بیان نا رداٹ نگران وزیراعظم انوارالحق کاکڑ تون کینیا نا صدر ڈاکٹر ولیم روٹو بیجنگ اٹ اڈ ہلوک مسٹ میکو بیلٹ اینڈ روڈ فورم نا وخت آ اوڑدہی کرے ہراٹی ہڑتوم آ راہشون تا پاکستان و کینیا نا نیام اٹ چندی بشخ آتیٹی کمکاری نا مون آدننگ آ گپ وتران کریر۔ وزیراعظم انوارالحق کاکڑ و صدر ڈاکٹر ولیم روٹو اقتصادی کمکاری ءِ مون آ درسا ہڑتوم آملک آتا نیا م اٹ واپار نا کچ آن پبی فائدہ ہرفنگ آ ہم امنا کریر۔ داوخت آ وزیراعظم پارے کہ بیلٹ اینڈ روڈ انیشی ایٹیو( بی آرٹی ) نا شریداری باسک مننگ نا ناطہ پاکستان دا ڈٹ انا ارٹمیکو باسک ملک بشمول کینیا تون پین شونداری ڈٹ و گام گیج آتا کمکاری نا خواہندار ءِ۔ داپاکستان نا شریداری شونداری کن کوشست و ڈیہہ انا شونہالی کن کمکاری نا است خواہی نا درشانی ءِ۔ ڈاکٹر ولیم روٹو کینیا نا کنڈآن پاکستان نا کشاری و جان جوڑی نا بشخ اٹی آزموندہ غاتیان فائدہ دوئی کننگ نا است خواہی نا درشانی ءِ کرے۔ وزیراعظم کینیا نا صدر تون پاکستانی صحافی ارشد شریف شہید نا خون آ جوڑ مروک  آ خصوصی جوائنٹ انویسٹی گیشن ٹیم ءِ تینا رپورٹ ءِ زوت گڈیکو دروشم اس تننگ اٹ آسراتی فراوان کننگ نا درخواست کرے۔ وزیراعظم کینیا نا صدر ءِ زوت پاکستان وخت اس کہ کینیا نا صدر وزیراعظم ءِ کینیا نا دورہ ءِ کننگ نا سلہ خلک ہرادے ہڑتوم آ راہشونک امنا کریر۔