سی  پیک اسیجائی آخبت اتون چین پاکستان کمیونٹی ٹی ٹہیفنگ اٹ ستاکڑزوک ءُکوشست اسے، نگران وزیراعظم انوارالحق کاکڑ نا چائنا ڈیلی ءِ خصوصی انٹرویو

بیجنگ۔ 17 اکتوبر (اے پی پی) نگران وزیراعظم انوارالحق کاکڑ گیشتر بھرم تا حامل بیلٹ اینڈ روڈ انیشی ایٹیو ڈٹ انا ستاءِ کرسا پارینے کہ چین پاکستان اقتصادی راہداری ڈٹ (سی پیک ) غٹ اکن فائدہ ئی کمکاری و تین پہ تینی شریداری نا عملی درشانی ءِ، دا ڈٹ پاکستان نا راجی و اقتصادی شونداری ٹی بھاز اہمیت تخک وخت اس کہ بیلٹ اینڈ روڈ انیشی ایٹیو آن نیزگاری و بے بریبری ءِ کم کننگ اٹ کمک رسینگک۔ اوداہیت ءِ سے شنبے  نادے آ داڑے شینک مروک آ چائنا ڈیلی اتون اسہ خصوصی انٹرویواسے ٹی پارے۔ وزیراعظم چینی صدر شی جن پنگ نا بصیرت انگیز بیلٹ اینڈ روڈ انیشی ایٹیو ڈٹ انا ستاءِ کرسا پارے کہ دا گیشتر بھرم تا حامل ءِ، دا ڈٹ آن نیزگاری و بے بریبری ءِ کم کننگ اٹ کمک رسینگک وخت اس کہ داڑتون اوار اوار جوان شونداری، مخلوق نا خراج ادا کننگ نالائخی ٹی گچینی و حکومت آتا کنڈآن وام تا ادائیگی نا لائخی ٹی ودکی مریک۔ نگران وزیراعظم بی آر آئی ڈٹ ءِ اوٹی شریک ملک آتے ’’وام، تا جال‘‘ اٹی اختہ کننگ نا تاثر ءِ مسترد کرسا پارے کہ چین پدتموک ملک آتے شونداری فنانسنگ نااسہ انوکھا وڑاس پیش کننگ ءِ ہرابیدس شڑت و روایتی شونداری مالیاتی ماڈل آتیان جتا ءِ، بی آرآئی فنانسنگ ءِ ’’وام تا جال‘‘ نا وڑاٹ بیان کننگ غلط ءِ دا ڈٹ داٹی اوار ملک آتے اوفتا الس نا پائیدار و جوان شونداری نا دوئی کننگ اٹ کمک نا اسہ اہم ءُ ذریعہ اسے۔ اووضاحت کرے کہ چین پاکستان اقتصادی راہداری نا رداٹ پاکستان اٹ 25 ارب ڈالر آن زیات نا براہ راست زرکاری کننگانے و داڑان جم وڑاٹ 2 لکھ 36 ہزار ملازمت ودی مس و دا ملک انا راجی و اقتصادی شونداری ٹی اہمیت تخک۔ اوپارے کہ داڈٹ اسہ آجو، مربوط و جوان شونداری نا نمونہ نا گچین مثال اس پیش کیک ہرا ملک انا غٹ بشخ و راج انا غٹ تپہ غاتے فائدہ ایتک۔ اومستی پارے کہ گوادر پورٹ انا شونداری مہالو آن پوسکن آ اقتصادی وارخواہی ودی کرینے۔ وزیراعظم پارے کہ تزویراتی محل و وقوع تخوک آ گوادر بندرگاہ داسہ فعال ءِ، و اوغانستان کن ٹرانس شپمنٹ واپار تون اوار کارگو جہاز باقاعدگی اٹ داڑے لنگرانداز مننگ ءُ، داہندی، چینی و ایلو جہانی زرکارآتیکن منافع بخش آسودہی  تننگ کن اسہ آزاد اقتصادی زون اس ہم ارے۔ اوپارے کہ گوادر اٹی اسہ پوسکن  ءُ جہانی بالی پٹ اس تفنگک، ہراڑان بندرگاہ ءِ علاقائی واپار و رابطہ نامرکز نا وڑاٹ کاریم کننگ نا تینا وژن نا خڑک اتنگک۔ وزیراعظم داہیت آ زور شاغا کہ چینی کارندہ و ادارہ غاتا فول پروف سیکورٹی  و اوفتا رکھ ننا اولیت ءِ۔ اوپارے کہ پاکستانی حکومت چینی کارندہ و کاروباری بندغ آتا رکھ اکن سخت رکھی پروٹوکول ءِ تینا کرینے۔ اومعلومدار کرے کہ باقاعدہ سیکورٹی بریفنگ، خطرہ غاتا تشخیص و ہڑتوم آملک آتا نیام اٹ معلومداری تا ہل و تس داپروٹوکول آتیٹی اوار ءِ تانکہ ممکنہ خطرہ غاتا پیدواری ءِ کننگ مرے ، اوکمیونسٹ پارٹی آف چائنا نا کماشی ٹی 80 کروڑ آن زیات مخلوق ءِ نیزگاری آن کشنگ اٹ چین نا نمان سرسہبی تا ذکر ءِ کرسا پارے کہ چین آنبار پاکستان ہم اسہ پدتموک ءُ ملک اسے ، ہرانا آبادی 24 کروڑ ءِ، تینا قوم ءِ پائیدار شونداری نا کسر آ شاغنگ کن نن چین آن بھاز انگا گڑاتے ہیل کینہ۔