پاکستان کن چین اتون برادرانہ تعلقداری آن ود ہچ ءُ اہم ءُ رشتہ اس اف، نگران وزیراعظم نا چینی تھنک آن تران، چینی زرکار آتے گرین انرجی ڈٹ آتیٹی زرکاری نا سلہ

بیجنگ۔ 17 اکتوبر (اے پی پی) نگران وزیراعظم انوارالحق کاکڑ پارینے کہ پاکستان کن چین اتون ایلمی تعلقداری آن ود ہچ ءُ اہم ءُ رشتہ اس اف، ننا ہڑتوم آ کنڈآتا خصوصی تعلقداری آ پاکستان اٹی قومی امنائی سلاہ ءِ، پاکستان اسٹ اسے ہم پاک چین تعلقداری  ءِ زہمی کننگ نا موکل تفک، سی پیک اسہ گیم چینجر ڈٹ اسے ہراپسماندہ و نزور تپہ غاتا راجی و اقتصادی شونداری نا کسر ءِ آوار کرے، داچین و پاکستان نا نیام اٹ تزویراتی پت انا درشانی ءِ۔ داخیال آتا درشانی ءِ او سے شنبے نادے آ داڑے چین نا دورہ ٹی چینی تھنک ٹینک و اسکالر آتیان تران کرساکرے۔ نگران وزیراعظم پارے کہ دا ہڑتوم آ کنڈآتا شرہ غاتیٹی اوار مننگ اوڑکن بے کچ اہمیت تخک و دا شرہ اسہ ہندن ءُ وخت اسے ٹی مننگ ءِ ہراتم چین پاکستان اقتصادی راہداری نا دہ سال پورو مسنے۔ داوخت داتم اسکان سفر نا جاچ ءِ ہلنگ و آخبت کن لائحہ عمل اس تیار کننگ نا خواہندار ءِ۔ وزیراعظم پارے کہ پاکستان و چین نا بے مٹ سنگتی ہرموقع غا ثابت قدمی رہینگانے، ہڑتوم آ ملک آتا نیام اٹ تعلقداری تین پہ تینی پت و اسیجائی فائدہ غاتا بنداو آ استوار ءِ۔ پاکستان کن چین اتون برادرانہ تعلقداری آن زیات ہچ ءُ پین رشتہ اس اہم اف۔ پاکستان و چین نا ہڑتوم آ کنڈآتا خصوصی تعلقداری ءِ پاکستان اٹ قومی امنائی دوئی ءِ۔ وزیراعظم پیدوار کرے کہ پاکستان اسٹ اسے ہم ننا دوستانہ تعلق ءِ زہمی کننگ نا موکل تفک۔ اوپارے کہ سی پیک اسہ فلیگ شپ ڈٹ اسے ہرا پاک چین تزویراتی کمکاری نا درشانی ءِ۔ سی پیک ہڑتوم آ ملک آتا ودوک آ اقتصاد ی و اپاری تعلقداری نا نشان ءِ۔ دا اسہ انقلابی ءُ ڈٹ اسے ہرا پائیدار شونداری نا قومی ایجنڈا ءِ مون آ ودفنگ ءِ۔ سی پیک نا سوب آن تدوک آ 10 سال اٹی پاکستان نا راجی زرگزرانی منظرنامہ بدل مسنے۔ گلگت آن کراچی و گوادر نا بندرگاہ اسکان پاکستان نا راجی و اقتصادی لینڈ سکیپ اٹی بدلی نظر بننگ ءِ۔ سی پیک پاکستان نا بنداوی پنجر ءِ پوسکن کرے۔ اوپارے کہ سی پیک نا ڈٹ آتیان ننا ورنا آبادی ءِ شونداری نا وارخواہی ملا۔ روزگار نا وارخواہی، نیزگاری ٹی کمتی، خلقی علاقہ غاتا شونداری ٹی سی پیک مرکزی کڑد ادا کرے۔ سی پیک پسماندہ و نزور تپہ نا راجی و اقتصادی شونداری نا کسر ءِ آوار کرے۔ اوپارے کہ کنا تعلق نسبتا کم شون ہلوک صوبہ بلوچستان آن ءِ و سی پیک بلوچستان کن ہم شونداری و شونہالی اس ایسنے۔ اوپارے کہ سی پیک چین و پاکستان نا نیام اٹ تزویراتی پت انا درشانی و شونداری و روشنا آخبت نا دوئی کننگ کن پاکستان نا عزم انا درشانی ہم ارے۔ اوپارے کہ سی پیک اوغانستان و ڈیہہ انا ایلو ملک آتیکن ہم وارخواہی اتسا بسنے۔ چین و پاکستان گوادر ءِ علاقائی رابطہ غاتا مرکز جوڑ کننگ کن سنبرینگوک ءِ۔ اوپارے کہ نن سی پیک آن فائدہ ہرفنگ کن پوسکن آ شریدار آتے بخیر اٹ پاننگ کن تیار اُن۔ دا سینٹرل ایشیا و مڈل ایسٹ کن ہم فائدہ مند ءِ۔ سی پیک نا کمک اٹ نن 800 کلومیٹر پوسکن ءُ سڑک و شاہراہ تا نیٹ ورک اس تالان کرینن، نیشنل گریڈ اٹی 8000 میگاواٹ بجلی اوار مسنے و 2 لکھ آن زیات روزگار نا وارخواہی ودی مس۔ دااسہ گیم چینجر ڈٹ اسے۔ وزیراعظم سی پیک نا پوسکن آ ریسہ ٹی چینی زرکارآتے گرین انرجی نا ڈٹ آتیٹی زرکاری نا سلہ خلسا پارے کہ پاکستان صنعتی پارکس و انڈسٹریل زون تا جوڑ کننگ کن چینی ماڈل آن ہیل کننگ نا خواہندار ءِ۔