چین وپاکستان سی پیک ءِ شونہالی، روزگار، رابطہ و گرین شونداری آ تالان راہداری ٹی بدل کننگ آ امنا کرینو، نگران وزیراعظم انوارالحق

بیجنگ۔ 17 اکتوبر (اے پی پی) نگران وزیراعظم انوارالحق کاکڑ پارینے  کہ چین و پاکستان چین پاکستان اقتصادی راہداری (سی پیک) ءِ شونہالی، روزگار، رابطہ و گرین شونداری آ تالان راہداری ٹی بدل کننگ آ امنا کرینو۔ سے شنبے نادے آ وزیراعظم آفس نا میڈیا ونگ آن جاری پریس ریلیز نا رداٹ نگران وزیراعظم انوارالحق کاکڑ بیجنگ اٹی اینو چین پاکستان اقتصادی راہداری سی پیک آ اڈہلوک گول میز دیوان نا کماشی ءِ کرے۔ دیوان اٹی چینی اسکالر، تعلیمی ادارہ و تھنک ٹینک آتا پولکار آک بشخ ہلکر۔ دیوان اٹی وزیراعظم پاکستان نا چین پاکستان اقتصادی راہداری سی پیک نا بابت پاکستان نا علاقائی رابطہ و پائیدار شونداری نا مون آ دننگ نا ویژن نا درشانی ءِ کرے۔ اوتدوک آ دہ سال اٹی پاکستان نا راجی و اقتصادی شونداری ٹی سی پیک نا مثبت کڑد ءِ ہم مون آ تخا۔ وزیراعظم سی پیک نا پاک چین متکن آ سنگتی و سٹریٹجک شریداری ٹی اہم کڑد انا اہمیت آ زور شاغا و پارے کہ پاک چین سنگتی تین پہ تینی کمکاری و شرف آ تالان ءِ۔ تدوک آ دہ سال اٹی سی پیک آ پیش رفت نا جاچ ءِ ہلسا وزیراعظم دا بابت سرسہبی، داعمل اٹی دوئی مروک اسباق و آخبت نا شونداری ڈٹ آتیکن لائحہ عمل آ گپ وتران کرے۔ اوپارے کہ چین و پاکستان سی پیک ءِ شونہالی، روزگار، رابطہ و گرین شونداری آ تالان راہداری ٹی بدل کننگ آامنا کرینن۔ نگران وزیراعظم تینا تاثرآتیٹی چینی اسکالر و پولکار آک سی پیک ءِ بی آرآئی نا رداٹ پاکستان و چین نا نیام اٹ گچین شریداری گوندا۔ اوچینی کمپنی تا کنڈآن پاکستان نا خصوصی زرکاری زون تیٹی زرکاری ٹی بھاز است خواہی ءِ ستاکڑزوک گوندا ہراڑآن سی پیک نا شونداری و علاقائی رابطہ و پائیدار شونداری نا ہدف آتا دوئی ممکن مریک۔ گول میز دیوان نا غٹ بشخ ہلوک آک داہیت آ امنا کریر کہ ہڑتوم آ ملک آتا کوشست آتیان سی پیک نئے بیرہ علاقائی واپار و رابطہ غاتیٹی مرکزی حیثیت دوئی کیک بلکن دا ہڑتوم آ ملک آتا مخلوق نا تین پہ تینی تعلقداری تے ہم مون آ دیک۔