تدوک آ 10 سال اٹی چین پاکستان اقتصادی راہداری نا رداٹ 30 آن زیات ڈٹ پورو مسنے ہراڑآن 2 لکھ آن زیات ملازمت ودی مس

اسلام آباد۔ 16 اکتوبر (اے پی پی) چین پاکستان اقتصادی راہداری (سی پیک) نا رداٹ تدوک آ 10 سال اٹی 30 آن زیات ڈٹ پورو مسنے ہراڑآن 2 لکھ آن زیات ملازمت ودی مس، سڑک، ریلوائی و بندرگاہ تیٹی زرکاری آن بیدس ارب آ ڈالر نا سی پیک ڈٹ ملکی زرگزران اٹی گچینی ، نیزگاری ٹی کمتی و پوسکن آواپاری کسر تے جوڑ کننگ نا بے پناہ گمان فراوان کیک۔ سی پیک کمامدارآتا رداٹ چائنا پاکستان اکنامک کوریڈور(سی پیک) دا شونداری کاریم تے مون آ درسا تینے پاکستان کن اسہ اہم اقتصادی محرک اسےنا وڑاٹ پک کرینے ہرا دانا بنداوی پنجر، توانائی، برآمدات، واپار، نقل و حمل ، کشت وکشار ، روزگار، دوائی، آئی ٹی، موبائل ٹیکنالوجی و بھاز انگا تے گچین کننگ ءِ۔ تدوک آ 10 سال اٹی، 200،000براہ راست و بالواسطہ ملازمت ودی کروک آ30 آن زیات ڈٹ پورو مسنے و پین شونداری نا چندی ریسہ غاتیٹی ءِ، ہراپائیدار اقتصادی شونداری کن اسہ تواراس قائم کننگ ءِ۔ داکان بیدس 6000 میگاواٹ آن زیات بجلی نیشنل گریڈ اٹی شاغنگانے، 809 کلومیٹر ہائی وے جوڑ کننگانے و پاکستان نا تاریخ اٹ اولیکو وار 886 کلومیٹر ٹرانسمیشن لائن خلنگانے۔ دہ سال مست تینا جوڑ مننگ آن پد آن سی پیک پاکستان نا بنداوی پنجر نا منظرنامہ ءِ بدل کرینے۔ اکتوبر 2022 اسکان6,370میگاواٹ آن زیات نا جم لائخی نا 11 ڈٹ پورو مسنے و 880 کلومیٹر مریس ایچ وی ڈی سی ٹرانسمیشن لائن تفنگانے۔ کم و ود1,200میگاواٹ نا گنجائشت والا پین مسہ ڈٹ 2023-24اٹی پورو مننگ نا اومیت ءِ۔ زوت آتے اٹ 1,320میگاواٹ تھرکول بلاک ون کمرشل آپریشن نابناءِ کرینے۔ سی پیک نا رداٹ پورو مروک آ ڈٹ آتیان بیدس ، ایلو کیہی ڈٹ آتیا عمل اٹی ءِ۔ ہرا پاکستان نا توانائی نا بنداوی پنجر ءِ پین مون آ دیرہ۔ خیبرپختونخوا ٹی 884 میگاواٹ نا سکی کناری ہائیڈرو پاور پروجیکٹ مہالو آن 70 درسد کاریم ءِ پوروکرینے۔ آزاد جموں و کشمیر اٹی کوہالہ ہائیڈرو پاور پروجیکٹ، ہرانا لائخی 1،124 میگاواٹ ءِ، 700.7میگاواٹ نا لائخی والا آزاد پتن ہائیڈرو پاور پروجیکٹ و 50 میگاواٹ چیچوونڈپاور پروجیکٹ ہم زیرعمل ءُ۔