پاکستان انڈونیشیاتون تینا تعلقداری تے قدر انا نظر اٹ ہرک، چیئرمین سینیٹ محمد صادق سنجرانی

اسلام آباد۔ 16 اکتوبر (اے پی پی) چیئرمین سینیٹ محمد صادق سنجرانی ایلم مسلم ملک انڈونیشیا تون تعلقداری تے پین سوگو کننگ نا عزم انا درشانی ءِ کرسا پارینے کہ پاکستان انڈونیشیاتون تینا تعلقداری تے قدر انا نظر اٹ ہرک۔ دوشنبے نادے آ سینیٹ سیکرٹریٹ نا کنڈآن جاری بیان نا رداٹ چیئرمین سینیٹ تون پاکستان اٹ انڈونیشیا نا سفیر ایڈم ٹوگیوپارلیمنٹ ہاؤس اٹی اوڑدہی کرے ہراٹی تین پہ تینی است خواہی نا امور آ گپ وتران کننگا۔ اوڑدہی ٹی واپار و زرکاری آ خاص چکار اتون ہڑتوم آ ملک آتا نیام اٹ ہڑتوم آ کنڈآتا اقتصادی کمکاری ءِ ودفنگ نا عزم انا درشانی ءِ ہم کننگا۔ چیئرمین سینیٹ مسلم برادر ملک انڈونیشیا تون تعلقداری تے پین سوگو کننگ نا عزم انا درشانی ءِ کرسا پارے کہ پاکستان انڈونیشیا تون تینا تعلقداری تے قدر انا نظراٹ ہرک۔ اوپارے کہ ہڑتوم آ ملک آک مدام مشکل وخت اٹی اسہ ایلو تون تفینو و ہڑتوم آ ملک آک تین پہ تینی فائدہ غاتا مون آ دننگ کن اواری اٹ کاریم کننگ نا خواہندار  ءُ۔ اوڑدہی ٹی چندی بشخ خاص وڑاٹ واپار ، دودوربیدہ، سیل و سوات نا بشخ آتیٹی ہڑتوم آ کنڈآتا تعلقداری تے پین مون آ دننگ آ زور شاغنگا۔ چیئرمین سینیٹ پاکستان اٹ زرکاری کن چاگڑد ءِ سازگار گوندسا پارے کہ انڈونیشیا نا بزنس مین پاکستان اٹ زرکاری نا وارخواہی آن فائدہ ہرفنگ کیرہ۔ اوہڑتوم آ ملک آتا نیام اٹ واپاری کچ ءِ ودفنگ و پارلیمانی رابطہ غاتے سوگو کننگ تون اوار اوار اقتصادی سفارتکاری ءِ ہم مو آ دننگ نا گرج آ زور شاغا۔ فریق آک فلسطین نا ساڑی حالیت آتیا سرجم گپ وتران کرسا اقوام متحدہ نا قرارداد آتا رداٹ فلسطین نا ویل انا ایسری آ زور شاغار۔ چیئرمین سینیٹ پارے کہ جہانی واکدار آک اسرائیل آ زور شاغر کہ او کودک فلسطینی تا نسل کشی ءِ بند کے۔ اوپارےکہ اسلاموفوبیا نا چیلنج تون مون تننگ کن مسلم ملک آتا نیام اٹ سیوت و سخا بے کچ المی ءِ۔ اواری اٹ دا چیلنج نا جوانی اٹ مون ءِ توننگ مریک۔ اوڑدہی ٹی انڈونیشیا نا سفیر ایڈم ٹوگیو پارے کہ انڈونیشیا، پاکستان تون تعلقداری ءِ بے کچ اہم تکک۔ پاکستان نا ڈیہہ اٹی امن کن کوشست ستاکڑزک۔ انڈونیشیا چندی بشخ آتیٹی پاکستان تون ہڑتوم آ کنڈآتا تعلقداری تے پین مون آ دننگ نا خواہندار ءِ۔