کشت وکشار نابنداو آ شونداری آن خور انا پیدوار ءِ ودفنگ، نہاد آتے کم کننگ و برآمد آتیکن ودکی خور ودی کننگ اٹ کمک ملنگ کیک، صدر مملکت نا جہانی خور دے انا وخت آ کلہو

اسلام آباد۔ 16 اکتوبر (اے پی پی) صدر مملکت ڈاکٹر عارف علوی غذائیت آن پُر خور انا پیدوار ءِ ودفنگ کن  چندی پڑتیا کاریم کننگ نا گرج آ زور شاغسا پارینے کہ دیر وخور انا نظام ءِ گچین کننگ ، دیر انا گچین بست وبند، خلقی شونداری نا ڈٹ آتے فنڈ تننگ و بڑزکو کارکڑد نا آبپاشی نظام ءِ تینا کروئی مریک، کشت وکشار نا بنداو آ شونداری نئے بیرہ بزغرآتا کٹیا ءِ نمان وڑاٹ ودفنگ کیک بلکن داڑآن خور انا پیدوار ءِ ودفنگ، نہاد آتے کم کننگ و برآمد آتیکن ودکی خور ودی کننگ اٹ کمک ملنگ کیک۔ دوشنبے نادے آ ایوان صدر نا پریس ونگ انا رداٹ صدر مملکت  جہانی خور دے انا وخت آ تینا کلہواٹی پارےکہ جہانی خور دے اکتوبرا ٹی ہرسال جہانی کہول آ اڈتننگک، دا دے پائیدار کشت وکشار نااہمیت نا کنڈآ ننا چکار ءِ ترفک، دادے انا مسخت چندی پالیسی و گام گیج آتیکن حکومت و ایلو اسٹیک ہولڈرآتا مخ تفی دوئی کننگ ءِ۔ اوپارے کہ پاکستان اٹ نیزگاری ٹی کمتی و غذائی رکھ ءِ پک کننگ نا ننا کوشست ہمدا دروشم اٹ بھرمی مننگ کیک ہراتم کشت وکشار نا بشخ ءِ ضوان اہمیت تننگے۔ صدر مملکت پارے کہ داسال جہانی ادارہ خور غذائی رکھ ءِ پک کننگ کن ’’دیر زند ءِ‘‘ دیر خور ءِ: کس اس پدی سلپ‘‘ انا جوان سرحال اس درستی راستی کرفینے، داسرحال پاکستان نا ساڑی آ حالیت آتون بے کچ مطابقت تخک۔ اوپارے کہ جہانی کہول آ ، آبادی ٹی ترندی اٹ ودکی آن دیر انا طلب اٹ نمان ودکی مننگ ءِ، اسہ کساس اسے نا رداٹ  اسہ سد سال انا تہہ ٹی ننے کم و ود شش گنازیات دیرانا گرج مریک، پدتموک ملک آتیٹی دیر انا ودوک آ طلب و زیان نا سوب آن دیر انا دستیابی پدریسہ کم مننگ ءِ۔ صدر مملکت پارے کہ پاکستان نا خوش بختیءِ کہ ننتون آبی وسیلہ غاتا اسہ انوکھا ءُ امتزاج اس ساڑی ءِ، دریائے سندھ انا نظام دنیا نا بھلا آبپاشی نا نظام تیان اسٹ ءِ ہرا کم و ود 1.5 لکھ مربع کلومیٹر آ تالان ءِ و پاکستان نا کل کاشت شدہ ڈغارنا 83 درسد ءِ۔