صدر مملکت نا قائد ملت لیاقت علی خان شہید ءِ اونا 72 می برسی آ خراج عقیدت

اسلام آباد۔ 16 اکتوبر (اے پی پی) صدر مملکت ڈاکٹر عارف علوی قائد ملت لیاقت علی خان شہید ءِ قوم اکن اونا بے پناہ خذمت آتیا زبردست خراج عقیدت پیش کرسا پارینے کہ  دا دے ننے پاکستان نا آزادی و اونا الس نا راجی آسودہی کن قائد ملت نا بدل مفروک عزم انا یات ترفک۔ دوشنبے نادے آ ایوان صدر نا پریس ونگ نا رداٹ قائد ملت نا 72 می برسی نا وخت آ تینا کلہو اٹی صدر مملکت پارے کہ لیاقت علی خان جہد آجوئی ٹی بانی پاکستان قائد اعظم محمد علی جناح تون ہم کوپہ سلیس و او قوم انا تقدید ءِ بدل کننگ اٹ اہم کڑد ادا کرے۔ صدر پارے کہ لیاقت علی خان پاکستان نا اولیکو وزیراعظم نا وڑاٹ خذمت سرتس۔ قائد ملت ملک انا وتواجہی نا بھلا چیمپیئن و شاری تا راجی آسودہی نا زبردست مخ تف ئس۔ صدر مملکت پارے کہ لیاقت علی خان شہید پاکستان نا بنائی سال، قرارداد مسخت تینا کننگ و چیلنج آتا مون ءِ توننگ کن نوزائیدہ قوم انا راہشونی ٹی اہم کڑد ادا کرے۔ اوپارے کہ قائد اعظم نا وژن نا رداٹ اسہ شون پسند و شونہال پاکستان نا دوئی کننگ کن قائدِ ملت پوسکن جوڑ مروک آ ریاست نا بننداوتے سوگو کننگ کن سخت خواری کرے۔ صدر مملکت پارے کہ قائد ملت جمہوریت، کانود نا حکمرانی، مہاجرآتا آبادکاری و بحالی، ملک انا دفاع ءِسوگو کننگ و راجی و زرگزرانی انصاف نا مون آ دننگ کن کاریم کرے۔ ڈاکٹر عارف علوی پارے کہ قوم اتون لیاقت علی خان نا پنپروک آ تعلقداری قوم انا اجتماعی شعور آ بے مٹ نشان اس اِلانے، اسہ متحد، جمہوری و شون پسند پاکستان نا قائد ملت نا وژن ننا غٹ اکن کسر نا ڈیواءِ۔ صدر مملکت پارے کہ ببو نئے بیرہ لیاقت علی خان نا قربانی وخذمت آتے یات کین بلکن اسہ ہندن ءُ پاکستان اسے نا جوڑ کننگ کن تینا عزم انا درشانی ءِ کین ہراڑے انصاف، بریبری، و سیوت مرے۔ اوپارے کہ ببو قائد ملت لیاقت علی خان ءِ خراج عقیدت پیش کرسا اسہ گچین و شونہال پاکستان اسے کن کاریم کین۔ صدر مملکت دعاکرے کہ اللہ تعالیٰ قائد ملت ءِ جنت الفردوس اٹی بڑزکو ہند اس عطاکے  و و اونا نظریہ غاک بروک آ چین تسکان ننا راہشونی ءِ کرساکیر۔