سی پیک پاکستان نا راجی و اقتصادی منظرنامہ ءِ بدل کرینے تخانے، نگران وزیراعظم نا چینی اخبار اٹی مضمون

اسلام آباد۔ 16 اکتوبر (اے پی پی) نگران وزیراعظم انوارالحق کاکڑ چین پاکستان اقتصادی راہداری آ عملدرآمد کن اواری اٹ کاریم کننگ نا عزم انا درشانی ءِ کرسا پارینے کہ دا ڈٹ پاکستان نا راجی و اقتصادی منظرنامہ ءِ بدل کرینے تخانے، ننا رشتہ مستین، ساڑی وآخبت نا ءِ ، دا حقیقت ءِ اسہ گڑاس ہم بدل کننگ کپک، چین پاکستان سنگتی ڈیہہ اٹی امن و سوگوی نا سوب ءِ، پاکستان و چین خڑکی سنگت، تزویراتی شریدار و آہنی ایلم تا حیثیت اٹ اسیجائی آخبت نا مزل نا کنڈآ ہِننگ ءُ۔ دورہ ءِ چین نا وخت آ پنی آ چینی اخبار گلوبل ٹائمز اٹی تینا خصوصی مضمون اٹی وزیراعظم پارے کہ بیلٹ اینڈ روڈ انیشی ایٹیو(بی آر آئی) صدر شی جن پنگ نا بصیرت و دوراندیشی نا اسہ اہم ءُ ڈٹ اسے۔ نن صدر شی جن پنگ نا وژن و مدبرانہ لائخی تے خراج تحسین پیش کینہ ہرادہ سال مست ، بنی نوع انسان کن اسیجائی آخبت کن اسہ کمیونٹی نا وژن اس پیش کرے۔ اوپارے کہ ہم گرنچی و تین پہ تینی سیبو آ چین نا بیلٹ اینڈ روڈ انیشیٹو نا فلیگ شپ ڈٹ انا وڑاٹ ، پاکستان بی آر آئی ٹی اوار مروک آ ملک آتیٹی اولیکو ملک ئس۔ سی پیک پاک چین تعلقداری ٹی اہم مزل نا حیثیت تخک۔ اوپاکستان نا راجی و اقتصادی منظرنامہ ءِ بدل کرینے، پوسکن آ انفراسٹرکچر ءِ اپ گریڈ کرینے، علاقائی رابطہ غاتے ودفینے، توانائی نا رکھ ءِ پک کرینے و روزگار نا وارخواہی ودی کرینے۔ نگران وزیراعظم پارے کہ پاکستان سی پیک نا ارٹ میکو ریسہ غا عملدرآمد و پوروی کن سنبرینگوک ءِ۔ نن چین نا سی پیک نا بطور شونداری، اختراع ، ذریعہ معاش، گرین اکانومی ، ہراسٹ نا رسینگ و جوان راہداری نا سلاہ نا پورو مخ تفی ءِ کینہ ۔ اوپارے کہ بی آرآئی اسیجائی آخبت نا جہانی برادری نا اسہ اہم ءُ تمبہ اسے۔ گلوبل ڈویلپمنٹ انیشی ایٹو(جی ڈی آئی) گلوبل سیکورٹی انیشی ایٹو(جی ایس آئی) و گلوبل سولائزیشن انیشی ایٹیو( جی سی آئی )’’ اسیجائی کمیونٹی‘‘ ن اتصور ءِ پین گچین کرینے۔ اوپارے کہ پاکستان جی ڈی آئی گروپ آف فرینڈز نا ہم اسہ اہم  ءُ باسک اسے و اودے پین پبی ءُ دروشم اس تننگ اٹ فعال کڑد ادا کرینے۔ اوپارے کہ جی ڈی آئی آ مفاہمت نا یات داشت (ایم او یو) آ دستخط کروک آ اولیکو ملک انا وڑاٹ پاکستان تعلیم، جان جوڑی، موسمیاتی بدلی و نیزگاری  ٹی کمتی نا بشخ آتیٹی دا کمکاری آن وخت آ انداز اٹ فائدہ ہرفنگ کن تیار ءِ، ہندا وڑ پائیدار شونداری نا ہدف آتے وخت آ پورو کننگ اٹ کڑد ادا کننگ ءِ۔ وزیراعظم پارے کہ پاکستان جی ایس آئی و اقوام متحدہ نا منشور و کثیر الجہتی اصول و اندرونی باندات آتیٹی عدم مداخلت نا ہم مخ تفی ءِ کرینے۔ ہم حل مفروک آ جھیڑہ و دہشت گردی نا سوب آن بھلو وخت اسسکان نسخان ہرفنگ آن زہمی سویلی ایشیاٹی علاقائی امن ءِ پک کننگ کن تین پہ تینی شرف آ تالان گپ وتران وتعمیری ہیت وگپ نا مخ تفی ءِ کینہ۔ اوپارے کہ جی سی آئی صدر شی جن پنگ نا اسہ پین تاریخی و وخت آ گام اسے ، ہرا اختلاف نا گواچی دنیا ٹی تہذیب آتا نیام اٹ  مکالمہ، امن و مفاہمت نا ذریعہ جوڑ مننگ کیک۔ وزیراعظم پارے کہ پاکستان نا خارجہ پالیسی نا مسخت مدام اندرونی و بیرونی امن مسنے، جھیڑہ، زرگزرانی کسادبازاری، غذائی بے رکھ، راجی بے بریبری وموسمیاتی بدلی کون آ چندی چیلنج آتیان دوچار دنیا ٹی ، پاک چین اسٹریٹجک پارٹنر شپ انااہمیت بھاز زیات ءِ۔ داہڑتو م آ ملک آتا الس کن فخر و سکون نا سوب ءِ ہرا ڈیہہ انا تہہ ٹی و پیشن امن و سوگوی نا اہم عوامل ءِ۔ وزیراعظم پارے کہ پاک چین تعلقداری ایلمی، سنگتی و پت انا ہمو بشخ ءِ ہرانا بنداو آک ہفتاد سال آن زیات وخت مست تخنگاسس۔  داوخت آ ہڑتوم آ ملک آتا سرکڑدہ غاتا وژن آن تعلقداری کن پبی بنداو تخنگا ہرادے اوکان پد اسہ سوگو، متحرک، ہرآزمائشت آ پورو سلوک آ، ہروڑنا حالیت آتیٹی اسٹریٹجک کمکاری آ تالان شریداری ٹی مون آ دننگا۔ اوپارے کہ ای دا تعلقداری تے بھاز اہمیت ایتیوہ و فخریہ وڑاٹ چین ءِ تینا گچین سنگت پاوہ۔ اوپارے کہ داہیت بھاز دل نشیں ءِ کہ چین اٹی آئرن برادر نا اصطلاح بیرہ پاکستان کن مخصوص ءِ۔ پاکستان و چین نا بے مٹ شریداری و گہری سنگتی ہڑتوم آملک آتا فائدہ ٹی ءِ، ہراننا الس نا تاریخی گچین کاری ءِ۔