نگران وزیراعلیٰ میر علی مردان خان ڈومکی نا پالیسی اینڈ سٹریٹجی کمیٹی نا دیوان اٹی بذریعہ ویڈیولنک شرکت

کوئٹہ۔ 13 اکتوبر (اے پی پی) بلوچستان نا نگران وزیراعلیٰ میر علی مردان خان ڈومکی تدوک آ سال نوکاپ آن بھسکاری آن پد بحالی سرجزآتا بابت پالیسی اینڈ سٹریٹجی کمیٹی نا دیوان اٹی ویڈیولنک انا کمک اٹ بشخ ہلک۔ جمعہ نادے آ مروک آ دیوان نا کماشی ءِ نگران بنجائی وزیر پلاننگ و خصوصی گام گیج سمیع سعید کرے۔ نگران وزیراعلیٰ بلوچستان  دیوان  ءِ پارے کہ تدوک آ سال انا نوکاپ آن صوبہ ءِ 700 ارب روپئی آن زیات نا مالی و سٹرکچرل نسخان مسنے و نوکاپ آن بلوچستان اٹی 3 لکھ 21 ہزار 19 ہند پورو تمار وخت اس کہ 96 ہزار اسہ سد ءُ 66 ہند  جزوی زہمی مسر، 43 پول ءِ دیر درے، 2 ہزار 280 کلومیٹر روڈ نیٹ ورک بھس مس، اسہ ہزار 39 تعلیمی اارہ پورو بھس وخت اس کہ اسہ ہزار 793 جزوی زہمی مسر، ہندا وڑ آبپاشی نا پنجر بھاز بے وڑ زہمی مس ہراڑان کشت وکشار ءِ نسخان رسینگانے۔ نگران وزیراعلیٰ بلوچستان پارے کہ جہانی بحالی امداد اٹ بلوچستان کن جتا فنڈ آک گنج اس افس ہرافتے ٹی نسخان تا کچ اٹ ودکی المی ءِ، داوخت آ بلوچستان مالی مشکل آتا گواچی ءِ ہنداسوب آن جنیوا فنڈ اٹی بلوچستان نا 20 درسد گرانٹ شیئرنگ اٹ بنجائی حکومت ننا کمک ءِ کے و زہمی بشخ آتا بحالی کن حکومت بلوچستان تون طے مروک پروگرام آ عملدرآمد کن کمکاری نا عمل ءِ ترند کے، نگران وزیراعلیٰ صوبہ ٹی 100 ملین ڈالر نا نیشنل پروجیکٹ آ دمدستی عملدرآمد کن پالیسی اینڈ سٹریٹجی کمیٹی نا فورم نا توسط اٹ بلوچستان آن سلاہ کروک آفیسر آتا پینل آن اسہ آفیسر اسے نا بطور پروجیکٹ ڈائریکٹر تقرری ءِ ہم پک کرے۔