اسلام آباد۔ 13 اکتوبر (اے پی پی ) بینک دولت پاکستان نا گورنر جمیل احمد پارینے کہ مرکزی بینک انا ساڑی آ پالیسی گام گیج میکرو اکنامک عدم توازن ءِ مرکرسا سوگوی دوئی کننگ نا کنڈآ راہی روان ءِ، اسٹیٹ بینک تدوک آ اِراسال اٹی جم وڑاٹ پالیسی ریٹ اٹ 1500 بی پی ایس ودکی کرے، پیشن نا کھاتہ غاتیٹی بھلو گچینی اس بسنے و زرمبادلہ نا بفرز جوڑ کننگ انگ ءِ، سوگوی نا برجا گام گیج و لچکدار شرح مبادلہ نا سوب گمان ءِ کہ مالی سال 24ء ٹی برجاکھاتہ نا نسخان جی ڈی پی نا 0.5 آن 1.5 درسد نا حد اٹی رہینگک۔ داخیال آتا درشانی ءِ او مراکش اٹی آئی ایم ایف و جہانی بینک انا دیوان تا وخت آ اڈ ہلوک دود آتیٹی اہم جہانی زرکارآتون اوڑدہی ٹی پاکستان نا زرگزران نا بابت تران اٹی کرے۔ دادود آتا بست وبند ءِ جہانی کہول انا بینک بشمول بارکلیز، جے پی مورگن، سٹینڈرڈ بینک و جیفریز ئسک کریسر۔ اوڑدہی ٹی گورنر سٹیٹ زرکارآتے ساڑی آ میکرواکنامک پیش رفت، برجاچیلنج آتیا کروک آ پالیسی گام گیج و پاکستان نا زرگزران نا منظرنامہ غا حوال تس وخت اس کہ اوفتا سوج آتا ورندی ءِ ہم تس۔ اوزرکارآتے معلومدار کرے کہ حکومت ومرکزی بینک انا ساڑی پالیسی گام گیج میکرواکنامک عدم توازن ءِ مر کرسا سوگوی دوئی کننگ نا کنڈآ راہی روان ءِ۔ اوپارے کہ اسٹیٹ بینک ہمواولین مرکزی بینک آتیان اسٹ ءِ ہرا جہانی کہول آ ودوک آ کبینی نا رداٹ مانیٹری پالیسی ءِ سخت کننگ نا بناءِ کرے ولے گڑاس ملکی سختی خاص وڑاٹ تدوک آ مالی سال انا بناٹی بھلا نوکاپ کبینی ءِ کم کننگ نا اسٹیٹ بینک انا کوشست آتے پیچیدہ کرے۔
