اسلام آباد۔ 13 اکتوبر (اے پی پی) اینٹی نارکوٹکس فورس (اے این ایف) نا منشیات اسمگلنگ نا برخلاف کارروائی تا چرجوئی برجاءِ، 7 کارروائی تیٹی 88 کلو آن زیات منشیات دوئی، 9 دوبہ دار ءِ دزگیرکرینے۔ اے این ایف نا ترجمان نا رداٹ ایم ون موٹرو ے اسلام آبادآ گاڈی آن 15 کلو600 گرام چرس دوئی کرینے۔ دوئی چرس آتے کاراسے ٹی جوڑ کروک اودیم خانہ غاتیان دوئی کننگا۔ کارروائی ٹی چارسدہ نا ہنکینی اِرادوبہ دار آتیان سلہہ ہم دوئی کرینے۔ سنگجانی ٹول پلازہ اسلام آباد آ موٹرسائیکل سوار دوبہ دار زالبول آتون اوار دزگیرکرینے۔ کارروائی ٹی زالبول و موٹرسائیکل ناسیٹ اٹی اودیم کرو منشیات آتے دوئی کرینے۔ دوئی منشیات آتیٹی 2 کلو 200 گرام چرس، 500 گرام ہفیم و 1 کلو آئس اوار ءُ۔ باچاخان انٹرنیشنل بالی پٹ آ مسافر اسے نا پڈآن 87 آئس آن پُر کیپسول دوئی کرینے۔ خیبرنا ہنکینی دوبہ دار جہاز نمبر QR-601نا کمک اٹ قطراکن روانہ مسکہ۔ اے این ایف نا جمرود خیبراٹی چھاپہ مار کارروائی کرے۔ ترجمان پارے کہ دوبہ دارآتا برخلاف انسدادِ منشیات ایکٹ نا رداٹ مقدمہ درج کرسا مستی جاست وپاست نا بنا ءِ کننگانے۔
