اسلام آباد۔ 12 اکتوبر (اے پی پی) نگران وزیراعظم انوارالحق کاکڑ مسکوہی وزیراعظم نواز شریف نا وطن آ پدی بننگ اٹ ڈیل انا تاثر ءِ یکسر مسترد کرسا پارینے کہ نگران حکومت ڈیل اسےنا بشخ انت اکن مریک، نواز شریف عدالتی فیصلہ نا رداٹ ملک آن پیشن ہنا و اودے وطن آ پدی بننگ آ گڑاس کانودی سوج آتون مون تروئی مریک، نگران حکومت مسلم لیگ (ن) کن ہچ ءُ نرم گوشتہ اس تخپک۔ داخیال آتا درشانی ءِاو ڈیجیٹل پلیٹ فارم ’’وی نیوز‘‘ ءِ تروک آ انٹرویوٹی کرے۔ ہراتم وزیر اعظم نا سوج کننگاکہ نواز شریف ڈل اسے نا رداٹ پدی بننگ ءِ ؟ تو وزیراعظم ورندی تس کہ اسہ نگران حکومت اس داوڑنا ڈیل اسے نا انت بشخ مریک و انت اکن مریک۔ نواز شریف ہراتم اسہ عدالتی فیصلہ سے نا رداٹ ملک آن پیشن ہناتو ہمووخت آ عمران خان نا حکومت ئس، داوخت آ نئے تو اونگران سیٹ اپ و نئے پی ڈی ایم جماعت آتا حکومت ئس۔ اوپارے کہ نواز شریف ءِ وطن آ پدی بننگ آ گڑاس کانودی سوج آتون مون تروئی مریک و دا سوج آتا ورندی ہم کانودی ءِ۔ انوارالحق کاکڑ مسلم لیگ نوز کن نرم گوشہ تخنگ ناتاثر ءِ ہم پورو وڑاٹ مسترد کرے۔ اوپارے کہ نگران وزیراعظم جوڑ مننگ آن مست کنا مریم نواز، بلاول بھٹو، مولانا فضل الرحمان ، آصف علی زرداری و 9 مئی نا واقعہ غاتیان مست عمرا ن خان تون ہم اوڑدہی مس۔ اوپارےکہ ای بیوروکریٹ اس آخابلکن اسہ پارلیمنٹ نا باسک اس ئسٹ و ہموکان استیفہ ترسا ای دا منصب ءِ سنبھالانٹ ۔ غیرکانودی پردیسی تا بابت اسہ سوج اسے نا ورندی ٹی نگران وزیراعظم کاکڑ پارے کہ نن اسہ وڑاسے نا ہم باہوٹ آتے کشپننگ اُن بلکن بیرہ غیرکانودی وڑاٹ رہینگوک درملکی تے کشنگ اُن۔ پاک بھارت تعلقداری نا بابت سوج انا ورندی ٹی نگران وزیراعظم پارے کہ پاکستان و ہندوستان نا تعلقداری ٹی آر ایس ایس نا سوچ وکشمیر نا ویل حائل ءِ ، ای تکیوہ کہ ہڑتوم آ ملک آتا تعلقداری ٹی گچینی بایدے برے ولے حقیقت پسندانہ وڑاٹ ہُننگے تو فی الحال دانا ہچ ءُ گمان اس نظر بفننگ ءِ۔ اوپارےکہ ہندوستان سویلی ایشیاٹی اجارہ داری اس جوڑ کننگ خواہک، بھارت اٹ مسلمان ، سکھ و ایلو اقلیت آتیکن زند ءِ ژند کننگانے۔ اسرائیل ءِ امنا کننگ نا گمان نا بارواٹی سوج انا ورندی ٹی وزیراعظم پارے کہ دابارواٹی ہچ ءُ سوچ بچار اس مفننگ ءِ، اسرائیل اسہ غاصب ریاست اس ئس و ارے و نن فلسطینی تا حق و فلسطینی باہوٹ آتا اوفتا ڈغار آتیا پدی بننگ نا مخ تف اُن۔ زرگزران نا بابت اسہ سوج اسے نا ورندی ٹی وزیراعظم پارے کہ زرگزران نا گچینی کن کروک آ گام گیج نا دوررس اثرمریک، خصوصی سرمایہ کاری سہولت کونسل نا جوڑ کننگ کانود سازی نا نتیجہ ٹی عمل اٹ بسنے و بھلا زرگزرانی فیصلہ ہندا پلیٹ فارم آن مننگ ءِ۔ اوپارےکہ ڈالر ناریٹ انا شیف ہِننگ مہالو ہم مسنے ولے ڈالر نا ریٹ اٹی 40 یا45 روپئی نا یک دم آن کمتی اولیکو وار مسنے و چونکہ لس مخلوق، میڈیا و کاروباری تپہ خصوصی زرکاری سہولت کونسل نا فائدہ غاتے خنانے ہندا سوب آن دانا برجاسلنگ المی ءِ۔ بلوچستان نا ویل آتا بابت ہیت کرسا وزیراعظم پارے کہ بلوچستان نا اسہ ویل سیکورٹی ءِ و ایلو فتےٹی وسیلہ غاتا کمتی و گڑاس انتظامی خامیک اوار ءُ۔ وزیراعظم پارےکہ تدوک آ دے کوئٹہ ٹی ایپکس کمیٹی نا دیوان اٹی پاننگاکہ صوبہ ٹی گھوسٹ اسکول و بنداوی جان جوڑی ہند آتا پیدواری ءِ کننگا۔ اوفتیان گڑاس مالی فائدہ ہرفیر ولے بلوچستان نا الس زہمی مس۔
