اسلام آباد۔ 11 اکتوبر (اے پی پی) نگراں وزیراعظم انوارالحق کاکڑ پارینے کہ پاکستان و چین سی پیک نا سرسہبی ءِ پک کننگ کن سنبرینگوک ءُ و حکومت سی پیک نا رداٹ چندی ڈٹ آتا پوروی و اوفتا وخت آ عملدرآمد ءِ پک کننگ کن چینی کمامدارآتون کاریم کننگ ءِ۔ وزیراعظم آفس نا میڈیا ونگ آن جاری بیان نا رداٹ نگران وزیراعظم انوارالحق کاکڑ تون پاکستان اٹ چین نا سفیر جیانگ ژے ڈونگ چارشنبے نادے آ داڑے اوڑدہی کرے۔ داوخت آ وزیراعظم پارے کہ پاکستان وچین نا نیام اٹ ہرموسم اٹی آزموندہ تزویراتی کمکاری آ تالان شریداری نا حامل یکتا تعلقداری ءِ، ہڑتوم آ ملک آئرن ایلم و اسہ ایلو نا باپت سنگت ءُ۔ وزیراعظم چین نا صدر شی جن پنگ نا کماشی و وژن خاص وڑاٹ بیلٹ اینڈ روڈ انیشیٹیو(بی آرآئی ) نا ستاءِ کرے۔ وزیراعظم پارے کہ چین پاکستان اقتصادی راہداری ڈٹ آن ہڑتوم آ ملک آتا نیام اٹ زرگزران، واپار و ٹیکنالوجیکل تعلقداری ٹی ودکی مننگ ءِ۔ اوپارے کہ پاکستان و چین سی پیک نا سرسہبی ءِ پک کننگ کن سنبرینگوک ءُ و حکومت سی پیک نا رداٹ چندی ڈٹ آتا پوروی و اوفتیا وخت آ عملدرآمد ءِ پک کننگ کن چینی کمامدارآتون کاریم کننگ ءِ۔ چین نا سفیر نا وزیراعظم تون پاکستان اٹ بطور سفیر زمواری تے سنبھالنگ آن پد دا اولیکو اوڑدہی ئس۔ وزیراعظم چینی سفیر ءِ سفارتی زمواری تے سنبھالنگ آ مبارکبادی پیش کرسا اومیت ظاہر کرے کہ او ہڑتوم آ ملک آتا نیام اٹ تعلقداری تے پین سوگو کننگ کن کڑد ادا کیک۔
