اسلام آباد۔ 11 اکتوبر (اے پی پی) نگراں وزیراعظم انوارالحق کاکڑ پارینے کہ لس گچین کاری تا اڈتننگ اٹ ہچ ءُ تاخیر اس نظر بفننگ ءِ ، گچین کاری تا ساف شفاف اڈتننگ ءِ پک کننگ کن الیکشن کمیشن نا پبی کمک ءِ کینہ، سیاسی جماعت آتے تینا تہہ ٹی ہم جمہوریت اتوئی مریک، ہر سیاسی جماعت ءِ گچین کاری تیٹی بشخ ہلنگ نا حق دوئی ءِ ، ملک اٹی کانود نا حکمرانی ءِ پک کروئی مریک۔ چارشنبے نادے آ نجی ٹی وی چینل ءِ تینا انٹرویو اسے ٹی وزیراعظم پارے کہ کانود آ عملدرآمد و کانود نا حکمرانی ءِ پک کروئی مریک۔ نن کرنسی نا ہندن ءُ غیرکانودی مارکیٹ اسے ٹی دوشاغان ہرانا کانود اٹی گنجائشت اف، عسکری سرکڑدہ غاتے ہم دانا پبی کریڈٹ کاہک تدوک آ حکومت آک دا کنڈآ چکار کتور، اسہ سوج اسے نا ورندی ٹی اوپارے کہ ننے سویلین ادارہ غاتا کارکڑد ءِ گچین کروئی ءِ، پنچ سال انا مینڈیٹ پارلیمان نا مریک، ہرا تدوک آ مسہ دور تیان پورو کننگ ءِ، پارلیمان ہی وزارت عظمیٰ نا انتخاب ءِ کیک، جمہوری وڑاٹ حکومت نا بدلی پارلیمان نا حق ءِ۔ اوپارےکہ شفافیت و احتساب نا عمل ہراجمہوریت اٹی مفک او سرسہب مننگ کپک، پارلیمان نا تہہ ٹی تولوک آ مخلوق الس نا مینڈیٹ ءِ اتسا بریک، اوفتا زمواریک زیات ءُ، تینا وژن، کڑد و کارکڑد نا بنداو آ الس فیصلہ غاتا دا اختیار پارلیمنٹ نا باسک آتے تروک مریک۔ اسہ سوج اسے نا ورندی ٹی اوپارے کہ ہراتم اسکان سیاسی جماعت آک تینا شناخت و پنجر اٹ جمہوری مفسہ تو ملک اٹی جمہوریت سوگو مننگ کپک، سیاسی جماعت آتیٹی جمہوری رویہ نظر بریک تو اونا اثر راج آ مریک ۔ اوساڑی منصب آن پد سیاسی جماعت اسے ٹی اوار مننگ نا بابت سوج انا ورندی ٹی پارے کہ دا بابت آئینی یا کانودی قدغن اف، بلوچستان عوامی پارٹی نا داسہ بشخ افٹ، داہم ممکن ءِ کہ تینا جماعت اس جوڑ کیو، رجسٹرڈ سیاسی جماعت آتا دا آئینی و کانودی حق ءِ کہ او گچین کاری تیٹی بشخ ہلیر و تینا گچین کاری مہم ءِ چلیفر، صوبائی نگراں حکومت آتا کنڈآن آجو و انصاف اٹ گچین کاری تا اڈتننگ کن گام گیج آتا مانیٹرنگ ءِ کینہ۔ اوپارے کہ نواز شریف تون اوار ہراکہ سیاسی لیڈر مرے اگہ ننا فرائض منصبی نا بابت اوڑدہی نا است خواہی کیک تو اوڑتون ضرور اوڑدہی کینہ۔ اوپارے کہ ننے گورننس، اقتصادی پالیسی و سیاسی سوچ اٹ مستین اٹ مروک آ کمتی کوتاہی تیا سجفوئی مریک۔ اوپارے کہ نگراں حکومت نا کاریم ہڑدے ئی امور ءِ سرتننگ و شفاف گچین کاری تیکن کمک فراوان کننگ ءِ۔ ننا چکار ہنداڑآٹی ءِ، آجو و شفاف گچین کاری تے پک کینہ، نواز شریف نا بابت کانودی خواست آک پورو مریرہ۔ اوپارے کہ خارجہ پالیسی نا گچینی، پاکستان نا بطور ریاست سوگوی و شونداری وشونہالی کن الس عمران خان ءِ وونٹ تسوسس، اودے وونٹ فوجی تنصیب آتیا جلہو کن تننگتویسس، 9 مئی نا مقدمہ اسہ کانودی عمل اسے، سائفرریاست نا پراپرٹی مریک، دااِرا دفترآتا نیام اٹ کمیونیکیشن نا ذریعہ مریک۔
