اسلام آباد۔ 11اکتوبر (اے پی پی) نگران بنجائی وزیر حوالکاری و شینکاری مرتضیٰ سولنگی پارینے کہ سی پیک آن پاکستان و چین نا نیام اٹ السی رابطہ غاتے سوگوی ملانے، کم و ود28 ہزار پاکستانی طالب علم چین اٹی خواننگ ءُ، پاکستان اٹی چینی بولی ءِ ہیل کروک آتا کچ اٹی ترندی اٹ ودکی مننگ ءِ۔ سے شنبے نادے آ داڑ ے پاکستان نیشنل کونسل آف آرٹس اٹی آرٹ نمائش و دودوربیدہ ئی شوآن تران کرسا نگران بنجائی وزیر حوالکاری پارے کہ سی پیک نا بناآن پد آن پاکستان وچین نا نیام اٹ السی کہول آ رابطہ پوسکن آ بڑزی تیا سرمسنو، کم و ود 28 ہزار پاکستانی طالب علم چین اٹی خواننگ ءُ، کمکاری نا دا پلو بیلٹ اینڈ روڈ انیشیٹیو فریم ورک اٹ بے کچ اہمیت تخک۔ اوپارے کہ پاکستان اٹ چینی بولی ءِ ہیل کروک آ تاکچ اٹی ترندی اٹی ودکی مننگ ءِ، دابابت پنجاب یونیورسٹی ، نمل یونیورسٹی کون آ بڑزکو تعلیمی ادارہ غاتیٹی انسٹیٹیوٹ ہم جوڑ کننگانے۔ داکان بیدس پاکستانی طالب علم آک چینی بولی ءِ ہیل کننگ و پروفیشنل ڈگری/ڈپلومہ غاتا دوئی کننگ کن چینی حکومت نا وظیفہ غاتیا چینی یونیورسٹی تیٹی ہم خواننگ ءُ۔ اوپارے کہ پاکستان وچین نا فنکارآرٹ نا نمائش آتا کمک اٹ تینا فن پارہ غاتا نمائش کن گیشتر اسہ ایلو نا ملک آتا دورہ ءِ کیرہ۔ اوپارے کہ پاکستان و چین 2022اٹی اسیجائی اعلامیہ ٹی سوگو و ہڑتوم آکنڈآتا تعلقداری کن السی کہول آ رابطہ، سیل و سوات نا بشخ اٹی کمکاری و دودوربیدہ ئی ہن و برنا اہمیت آ زور شاغا۔ نومبر 2021اٹی مروک آ سیل و سواتی تبادلہ و کمکاری آ مفاہمت نا یات داشت آتیا عمل کرسا ہڑتوم آ ملک آک 2023اٹی پاک چین سیل و سواتی تبادلہ غاتا سال ءِ اڈتننگ و سیل و سوات ءِ مون آ دروک آ ہڑتوم آ ملک آتا ادارہ غاتا نیام اٹ سوگو رابطہ قائم کننگ آ امنا کریر۔ اوپارے کہ مئی 2023اٹی پیلس میوزیم اٹی پاک چین اسیجائی نمائش اٹی پاکستانی عجائب گھر تیان گندھارا تہذیب نا 173 وڑتا نمائش کننگا ہرانا مسخت ہڑتوم آ ملک آتا نیام اٹ اسیجائی میرات و دودوربیدہ ئی ہن وبرءِ مون آ دننگ تون اوار اوار لس مخلوق و چینی اسکالر آتیکن پاکستان نا میرات نا باراٹی بصیرت فراوان کننگ ئس۔
