بیجنگ۔ 12 اکتوبر (اے پی پی) چین بروک آہفتہ بیلٹ اینڈ روڈ جہانی اقتصادی فورم نا مہمانداری ءِ کیک، چینی خبررساں ادارہ نا رداٹ چینی وزارت خارجہ نا کنڈآن جاری بیان اٹی پارے کہ چین بروک آہفتہ بیجنگ اٹ مسٹ میکو بیلٹ اینڈ روڈ فورم جہانی اقتصادی فورم نا مہمانداری ءِ کیک۔ وزارت خارجہ گمان نا درشانی ءِ کرسا پارے کہ روس انا صدر ولادیمیر پیوٹن تدوک آ سال یوکرین آ روس انا جلہو نا بناآن پد اولیکو وار چین نا دورہ ءِ کیک و اوڑتون اوار چین نا صدر شی جن پنگ تون سروکی اوڑدہی کیک۔ چین و روس انا راہشون تا دُن انگا وخت اٹی تین پہ تینی تعلقداری ءِ سوگو تر کننگ نا گمان ءِ ہراتم چین وامریکہ نا نیام اٹ اختلاف برقرار ءِ و روس و دیکی ملک آتا نیام اٹ تعلقداری مخاصمانہ دروشم اس اختیارکرینے۔ چینی وزارت خارجہ پارے کہ فورم نا وخت آ ہڑتوم آ کنڈآتا اوڑدہی ہم مریک۔ اوپارےکہ داتم اسکان 130 آن زیات ملک آتا مندوبین بشخ ہلنگ نا فیصلہ کرینو۔ دا ڈٹ گلوبل ساؤتھ آن موسوم پدتموک و مون آ بروک زرگزران آتون کمکاری ءِ سوگو کننگ و دیکی برتری نا گیگ بدل تخلیق کننگ نا چینی عزم انا ڈیک ءِ۔
