کوئٹہ۔ 12 اکتوبر (اے پی پی)چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر اسہ خصوصی ءُ بیان اسے ٹی پارینے کہ اسرائیل اسہ کنڈآ کودک فلسطینی تیا خوفناک کارپٹ بمباری نا بناءِ کرینے ایلو کنڈآ غزہ ءِ گھیڑ کرسا کودک فلسطینی تیکن دِیر، بجلی، دوائی، و خور انا سپلائی ءِمعطل کرینے ہرانا سوب آن غزہ ٹی گھیڑ کودک فلسطینی تا زند بے کچ خطرہ غاتا گواچی مسنے، غزہ نا گھیڑ غیرکانودی ءِ، داڑان ناقابل بیان انسانی المیہ اس ودی مننگ ءِ، اوپارے کہ جنگ کننگ نا ہم اصول اس مریک، کودک چناو زالبول ءِ شست کننگ بے کچ غیراخلاقی و غیرانسانی رویہ نا زمرہ ٹی بریک، فاسفورس بمب آتا کاریم اٹ اتنگ منع ءِ انتئے کہ داہراڑے کہ تمرہ ہموعلاقہ ٹی بھلو کچ اسے آ خاخر لگک ، اسرائیلی وزیراعظم غزہ ٹی گھیڑ کودک فلسطینی تے شار ءِ اِلنگ نا پارینے داہیت ءِ اسرائیلی وزیراعظم نا اخلاقی پستی نا ڈیک ءِ ایتک۔ اوپارے کہ اسرائیلی وزیراعظم نا گنوئی آن فلسطینی تے رکھ تخنگ کن جہانی برادری ءِ دمدستی وڑاٹ مون آ بروئی مریک۔ دُن مف کہ فلسطین انسانی المیہ نا گواچی مرے اقوام متحدہ ، اوآئی سی ، عرب لیگ، افریقین یونین ءِ دمدستی و گچین گام گیج کننگ نا گرج ءِ۔ امریکہ سپرپاور ءِ تو اودے سپرپاور آنبار کڑد ادا کرسا دے ٹک نیامی ٹی ودی مروک آ تنکی حالیت آتے کنٹرول کروئی مریک۔ چیئرمین قائمہ کمیٹی مستی پارے کہ اسرائیل ءِ سلہہ و بارودی مواد فراوان کننگ نا جاگہ غا جہانی برادری ءِ فلسطین ءِ اسرائیلی جارحیت آن رکھ تخنگ نا فکر ءِ کننگے، دُن مف کہ دنیا بے حسی نا درشانی ءِ کرسا فلسطینی تا تماشہءِ ہرسا کے و غزہ ٹی گھیڑ 23 لکھ انسان ناقابل معافی المیہ نا ایندھن جوڑمریر، اگہ جہانی برادری زوت اسرائیل ءِ توتہو تو دنیا تاریخی بھسکاری آن دوچار مریک۔ روس ، چین سعودی عرب وترکی ءِ بطور خاص تیناکڑد ءِ اداکروئی مریک، تانکہ پین بھسکاری آن بچنگ مرے۔ اقوام متحدہ ءِ اسرائیل ءِ سویلین آبادی آ جلہو آتیان توروئی مریک، بجلی، خور و دوائی تا سپلائی ءِ گچین کروئی مریک۔
