اسلام آباد۔ 11 اکتوبر (اے پی پی) نگران بنجائی وزیرخزانہ، محصولات و اقتصادی امور ڈاکٹر شمشاد اخترپارینے کہ اسلامی شونداری بینک پاکستان نا اہم شونداری شریدار ءِ۔ اوداہیت ءِ چارشنبے نادے آ مراکش اٹی جہانی مالیاتی فنڈ و جہانی بینک انا سالانہ دیوان تا وخت آ اسلامی شونداری بینک انا صدر محمد سلیمان الجاسر تون اوڑدہی ٹی گپ وتران کرساپارے۔ اوڑدہی ٹی اقتصادی کمکاری و شونداری گام گیج آتا بابت امور آ جوان گپ وتران مس۔ فریق آک اقتصادی و مالیاتی تعلقداری تے مون آ دننگ و اقتصادی نموکن اواری اٹ کاریم کننگ نا اہمیت آن امنا کریر۔ وزیرخزانہ پارے کہ اسلامی شونداری بینک پاکستان نا اہم شونداری شریدار ءِ، و ملک انا اقتصادی و راجی شونداری ٹی اسلامی شونداری بینک اہم کڑد ادا کننگ اٹی ءِ۔ یات سلے کہ وزیرخزانہ جہانی بینک و جہانی مالیاتی فنڈ انا سالانہ دیوان تیٹی بشخ ہلنگ کن مراکش اٹی سرکاری دورہ غاٹی ءِ۔ دادورہ ٹی او جہانی بینک، جہانی فنڈ و ایلو مالیاتی ادارہ غاتا نمائندہ غاتون ہڑتوم آ کنڈآتا اڑدہی کیک۔
