کوئٹہ۔ 10 اکتوبر(اے پی پی) نگران وزیراعظم انوارالحق کاکڑ پارینے کہ بلوچستان نا امن و شونداری ءِ پک کننگ کن صوبہ نا راجی و اقتصادی شونداری المی ءِ، خصوصی سرمایہ کاری سہولت کونسل نا گام گیج آتیان پبی وڑاٹ فائدہ ہرفنگ کن غٹ تعلقدار غٹ تعلقدار محکمہ غاتا نیام اٹ ہم گرنچی نا گرج ءِ۔ سے شنبے نادے آ وزیراعظم آفس نا میڈیا ونگ آن جاری پریس ریلیز نا رداٹ نگران وزیراعظم انوارالحق کاکڑ چیف آف آرمی اسٹاف جنرل عاصم منیر تون اوار کوئٹہ نا دورہ ءِ کرے و صوبائی ایپکس کمیٹی نا 14 می دیوان اٹی خصوصی وڑاٹ بشخ ہلک ہراٹی وزیراعلیٰ بلوچستان میر علی مردان خان ڈومکی ہم ساڑی ئس۔ ایپکس کمیٹی نا دیوان اٹی بشخ ہلوک آتے نظرثانی مروک نیشنل ایکشن پلان، لاء انفورسمنٹ آپریشن، سمگلنگ و منشیات نا برخلاف بلوچستان اٹی آپریشن ، سی پیک و نان سی پیک یا پرائیویٹ ڈٹ آتیٹی کاریم کروک آ درملکی تا سیکورٹی، غیرکانودی درملکی تا اوفتا تینا وطن آ پدی ہِننگ، فارن کرنسی ءِ باقاعدہ جوڑ کننگ نا بابت گام گیج و بلوچستان اٹی ایس آئی ایف سی نا گام گیج آتیا پیش رفت نا بابت معلومدار کننگا۔ داوخت آ وزیراعظم بلوچستان حکومت نا کنڈآن پیش رفت آ است جمی نا درشانی ءِ کرسا بنجائی حکومت نا کنڈآن پورو کمکاری نا باوری کرفے۔ دیوان اٹی وزیراعظم زور شاغا کہ صوبہ نا امن و ایمنی ءِ پک کننگ کن بلوچستان نا راجی و اقتصادی شونداری المی ءِ۔ چیف آف آرمی اسٹاف داہیت ءِ مون آ تخا کہ فوج کانود نافذ کروک آ ادارہ و ایلو سرکاری محکمہ غاتون اواری اٹ غیرکانودی سرجزآتا برخلاف کارروائی تیکن پورو واک اٹ پورو کمک فراوان کیک تانکہ وسیلہ غاتا لٹ وپل و دا سرجزآتا سوب آن ملک ءِ مروک آ زرگزرانی نسخان تے توننگ مرے۔ وزیراعظم پارے کہ بنجانا کہول آ ایس آئی ایف سی نا رداٹ کروک آ گام گیج آتا ہر صوبہ نا مخلوق آ اثر بایدے مرے۔ بلوچستان قدرتی وسیلہ غاتیان شپ ءِ و کانڑ کنی و معدنیات نا بشخ اٹی شونداری آن علاقہ نا مخلوق کن زرگزرانی سرجز و روزگار نا وارخواہی ودی مریک۔ اوپارے کہ انسانی وسیلہ غاتا شونداری آن بیدس کشت وکشار و آئی ٹی ٹی زرکاری آ ہم چکار کننگے۔ وزیراعظم پارے کہ دا گام گیج آتیان پبی وڑاٹ فائدہ ہرفنگ کن غٹ تعلقدار محکمہ غاتا نیام اٹ ہم گرنچی نا گرج ءِ۔ بشخ ہلوک آ دا عزم انا درشانی ءِ کریر کہ ریاستی ادارہ بمعہ سرکاری محکمہ و الس صوبہ نا شونداری و شونہالی کن یکجاءُ۔ داکان مست وزیراعظم و آرمی چیف نا کوئٹہ غا سرمننگ آ نگران وزیراعلیٰ بلوچستان و بلوچستان کورکمانڈر اوفتے بخیرکریر۔ دیوان اٹی چیف آف آرمی اسٹاف ، نگران وزیراعلیٰ بلوچستان ، نگراں وزیرداخلہ ، نگراں صوبائی کابینہ نا باسک و عسکری ادارہ غاتا بڑزکو کمامدارآک ہم بشخ ہلکر۔
