اسلام آباد۔ 10 اکتوبر (اے پی پی) صدر مملکت ڈاکٹر عارف علوی ذہنی جان جوڑی نا چیلنج نا مون ءِ توننگ کن اسہ مربوط نقطہ نظر اس تینا کننگ نا گرج آ زور شاغسا پارینے کہ انفرادی ، ادارہ جاتی و قومی کہول آ اجتماعی کوشست مخلوق نا جم ذہنی جان جوڑی ءِ گچین کننگ اٹ کمکار مریک۔ ذہنی جان جوڑی نا جہانی دے 10 اکتوبر 2023نا وخت آ تینا کلہو اٹی صدر مملکت پارے کہ اینو نن ‘ذہنی جان جوڑی اسہ جہانی ءُ انسانی حق اسے’ نا مسلمہ سرحال تون ذہنی جان جوڑی نا جہانی د ے ءِ اڈتننگ اُن۔ دا دے ذہنی جان جوڑی نا اہمیت، ذہنی مرض آتا مخلوق نا زند آ تموک آ اثر، خاہوت نا کنڈآن کمک نا گرج، داویل انا درک، داسرحال آ منفی راجی تصور آتا مون ءِ توننگ و پروفیشنل کمک نا اہمیت نا بارواٹی آگاہی ودی کننگ کن اڈتننگک۔ اوپارے کہ قومی کمیشن انسانی حق پاکستان نا حساب و کتاب نا رداٹ پاکستان اٹ 24 درسد مخلوق ذہنی زور انا گواچی ءُ۔ زرگزرانی فریشانی تیان دا گھمبیر حالیت پین سنگین مریک۔ بدبختی اٹ پاکستان تون ذہنی ناجوڑی تا بھاریم تون مون تننگ کن کچ اٹ انسانی و مادی وسیلہ غاک ءُ۔ دا ناجوڑی تیان چنا، ورنا وزالبول آتا اسہ ودوک ءُ کچ اس زہمی مننگ ءِ۔ ہڑدے اخبارآتیٹی خودکشی، اُرائی جنگ و جھیڑہ و بیدادی نا سوب خون اسکان نا واقعہ رپورٹ مریک ۔ دا واقعہ غاتے قومی کہول آ نفسیاتی ناجوڑی تا بھاریم تون گنڈنگ مریک۔ صدر مملکت پارے کہ ذہنی جان جوڑی نا دا چیلنج نا مون ءِ توننگ کن ننے اسہ مربوط نقطہ نظر اسے نا گرج ءِ۔ ننے ذہنی جان جوڑی نا آن لائن پورٹل، ورچوئل پروگرام، مصنوعی ذہانت، دماغی جان جوڑی نا چیٹ بوٹس، ہیلپ لائن، تعلقدار حکومتی و ایلو اسٹیک ہولڈر آتے متحرک کننگ و نجی وسرکاری بشخ انا نیام اٹ شریداری ءِ جوڑ کروئی مریک۔ دُن تو زیات تر ذہنی ناجوڑی تا درمان بنائی ریسہ غاتیٹی تشخیص و درمان نا سوب آن کم نہاد اٹ کننگ مریک، ہنداسوب آن نن دماغی جان جوڑی و تندرستی نا بارواٹی بایدے آگاہی ودی کین۔
