برسلز۔ 10اکتوبر (اے پی پی) بیلجیم، لکسمبرگ و یورپی یونین اٹ پاکستان نا سفیر آمنہ بلوچ برسلز اٹی اڈ ہلوک اسہ دود اسے ٹی یورپین کونسل نا صدر چارلس مشیل ءِ باضابطہ وڑاٹ تینا سفارت سند آتے پیش کرے۔ سفیر آمنہ بلوچ صدر مملکت و وزیراعظم پاکستان نا کنڈآن اودے است انا حبا ٹ نیک است خواہی تا کلہو ءِ سرکرے۔ یورپین کونسل نا صدر ہم داوخت آ یورپی یونین نا کنڈآن پاکستانی سرکڑدہ غاتیکن گرم جوشی و خیرخواہی نا جوزہ غاتا درشانی ءِ کرے۔ اوڑدہی ٹی فریق آک اسیجائی وڑاٹ یورپی یونین تون پاکستان نا تعلقداری تا اہمیت ءِ امنا کرسا دا تعلق ءِ اسہ اسٹریٹجک و کثیر جہتی شریداری نا وڑاٹ ٹہیفنگ نا گرج آ زور شاغا۔ اوپارے کہ تین پہ تینی وڑاٹ فائدہ تعلقداری تے مون آ دننگ نا گرج ءِ۔ پاکستان نا سفیر آمنہ بلوچ یورپین کونسل نا صدر تون تینا گپ وتران اٹی بھارت نا غیرکانودی کوزہ ٹی جموں و کشمیر اٹی انسانی حالیت آتا بارواٹی سرجم آتیان معلومدار کرے۔ گپ وتران اٹی یورپی یونین و پاکستان نا نیام اٹ تعلقداری تے ودفنگ و سوگو کننگ نا اسیجائی است خواہی نا درشانی ءِ کننگا۔
