اسلام آباد۔ 10 اکتوبر (اے پی پی) نگران بنجائی وزیر ڈاکٹرعمر سیف پارینے کہ انفارمیشن ٹیکنالوجی نا بشخ اٹی کارآمد افرادی قوت نا فراوانی کن طالب علم آتے اوریکل سرٹیفکیٹ دوئی کننگ المی مریک، آئی ٹی نا تعلیم تروک آ ادارہ غاک اسہ سال انا انٹرن شپ انا بست وبند ءِ کیرہ۔ اے پی پی تون خصوصی گپ وتران کرسا اوپارے کہ ننا تعلیمی ادارہ غاتیٹی تعلیم دوئی کروک آ طالب علم آتے پیشن نا ملک آئی ٹی ایکسپرٹ نا وڑاٹ وارخواہی دوئی کننگ اٹ سختی مون تروک ءِ۔ داناسوب تعلیمی ادارہ غاتیٹی آئی ٹی کن آزموندہ و مہارت نا بابت انٹرن شپ سرٹیفکیٹ نا فراوانی پک مفننگ ءِ۔ اوپارے کہ نگران حکومت مسہ تُو انا تہہ ٹی اسہ پوسکن ءُ وڑوڈول اس درستی راستی کرفنگ ءِ کہ ہرا طالب علم آئی ٹی نا بڑزکو تعلیم دوئی کننگ ءُ اوفتے اسہ سال انا پریکٹیکل ملک انا بھلاآئی ٹی کمپنی تیٹی کرفنگ المی مریک و دا چرجوئی ٹی تعلقدار تعلیمی ادارہ غاتے پابند کننگک کہ آئی ٹی نا تعلقدار کمپنی تیٹی اسہ سال انا انٹرن شپ نا بست وبند ءِ تینٹ کیر۔ اسہ سوج اسے نا ورندی ٹی اوپارے کہ پیشن نا ملک آئی ٹی ایکسپرٹ نا وارخواہی تا دستیابی کن طالب علم آتے اوریکل آن سرٹیفکیٹ نا دوئی کننگ المی گوندنگک۔ دا بابت گام گیج حکومت و تعلیمی ادارہ غاک تین پہ تینی کمک اٹ کیرہ۔
