اسلام آباد۔ 10 اکتوبر (اے پی پی) نگران بنجائی وزیر حوالکاری و شینکاری مرتضیٰ سولنگی پارینے کہ پاکستان سویٹ ہوم راج انا غٹ آن نزور تپہ نا رکھ، پرورش و تعلیم نا ذریعہ ءِ، پاکستان سویٹ ہوم نا چناک زند انا غٹ بشخ آتیٹی تینا لائخی تے پک کرینو۔ داہیت ءِ او سے شنبے نادے آ پاکستان سویٹ ہوم نا سرپرست اعلیٰ زمردخان تون اوڑدہی ٹی گپ وتران کرسا کرے۔ اوڑدہی ٹی تین پہ تینی است خواہی نا امور آ گپ وتران مس۔ نگران بنجائی وزیر حوالکاری زمردخان نا پاکستان سویٹ ہوم نا چناتیکن خذمت آتے خراج تحسین پیش کرسا پارے کہ زمردخان نا بدل مفروک جوزہ و پاکستان سویٹ ہوم نا کمک اٹ چوری آ چنا و ضرورت مند چناتا خذمت ستاکڑزک۔ داوخت آ گپ وتران کرسا زمردخان پارے کہ پاکستان سویٹ ہوم اینو تینا مسخت آتے دوئی کننگ ءِ، پاکستان سویٹ ہوم نا چناتے پوسکن آ تعلیم تون اوار اوار گچین تربیت ہم فراوان کننگ انگ ءِ، اومیت ءِ کہ دا چناک آخبت اٹ ملک انا اہم بشخ آتیٹی تینا خذمت آتے سرایترہ۔
