کوئٹہ۔ 10 اکتوبر (اے پی پی)پاکستان پیپلزپارٹی بلوچستان نا راہشونک پارینو کہ بلوچستان نا ورناتیٹی لائخی نا ہچ ءُ کمتی اس اف اگہ اوفتے جوان وارخواہی فراوان کننگے تو او نئے بیرہ پاکستان بلکن پیشن نا ملک ہم پاکستان نا پن ءِ روشنا کننگ کیرہ، ورناتے جان جوڑ انہ سرجزو اسپورٹس نا کنڈآ اتسا منشیات و ایلو راجی گندہ ئی تیان مُر تخنگ مریک، گوازی گر ہرملک انا سفیر مریک، پاکستان پیپلزپارٹی ورناتے ہر بشخ اٹ مون آاتنگ آ یخین تخک انشاء اللہ برسراقتدار برسا ورناتے ہرممکن آسراتی تا فراوانی ءِ پک کینہ۔ داہیت ءِ پاکستان پیپلزپارٹی بلوچستان نا صدر میر چنگیز خان جمالی ، مسکوہی بنجائی وزیر سردار عمرخان گورگیج، ڈپٹی انفارمیشن سیکرٹری قاسم خان اچکزئی ، صوبائی راہشون انجینئر ہادی عسکری، ڈسٹرکٹ کوئٹہ نا صدر میر نصیب اللہ شاہوانی، سید داؤد آغا، ملک عیسیٰ خان ہزارہ، عہدیہ، بتول، ماہ جبین جمالی، چناء درانی، ساجدہ بنگلزئی و ایلوفک پاکستان پیپلزپارٹی ہزارہ ٹاؤن نا کنڈآن ہزارہ ٹاؤن نا انٹرنیشنل و نیشنل گوازی گر و چندی زند انا بشخ آتیان تعلق تخوک آ بندغ آتیٹی شہید گودی بینطیر بھٹو ایوارڈ بشخنگ نا دود آن تران کرسا پاریر۔ ترانکارآک پاریر کہ پاکستان پیپلزپارٹی اسٹ انگا سیاسی ٹولی ءِ ہرا ہراتم کہ برسراقتدار بس او ورناتا ویل آتے ایسر کننگ کن گام گیج کرے و اوفتے مثبت سرجزآتا کنڈآ ایس ۔ اوپارے کہ بلوچستان نا ورناتیٹی ٹیلنٹ نا ہچ ءُ کمتی اس اف اگہ ورناتے جوان وارخواہی فراوان کننگے تو او نئے بیرہ پاکستان بلکن پیشن نا ملک ہم پاکستان نا پن ءِ روشنا کننگ کیرہ۔ اوپارے کہ ای نگران صوبائی وزیر گوازی نوابزادہ جمال خان رئیسانی ءِ پاوہ کہ ہزارہ ورناگوازی گر آتا اسپورٹس اٹی پبی امداد ءِ کے۔ اوپارے کہ ورناتے اسپورٹس نا کنڈآ اتساہی منشیات تون اوار ایلو راجی گندہ ئی تیان مرتخنگ مریک ہزارہ قوم آن تعلق تخوک آ گوازی گر آک نئے بیرہ نیشنل بلکن انٹرنیشنل مقابلہ غاتیٹی ہم سرسہبی دوئی کرسا ملک و صوبہ نا پن ءِ روشنا کریر۔ داکان مست میرچنگیزخان جمالی، سردار عمر گورگیج، قاسم اچکزئی، انجینئر ہادی عسکری، میر نصیب اللہ شاہوانی، ملک عیسیٰ خان ہزارہ و ایلوفک ہزارہ ٹاؤن آن تعلق تخوک آ گوازی گر و ایلو بشخ آتیٹی گچین کارکڑد نا درشانی ءِ کروک آتیٹی شہید گودی بینظیر بھٹو ایوارڈ بشخار۔
