اسلام آباد۔ 09 اکتوبر (اے پی پی) نگران وزیراعظم انوارالحق کاکڑ گورننس نا پنجر ، سیاست ، زرگزران تون اوار اہم قومی باندات آتیا دیانتدارانہ قومی ڈائیلاگ نا گرج آ زور شاغسا پارینے کہ صحت مند و شونہال راج اسے نا جوڑ کننگ کن قومی ڈائیلاگ نا بابت پارلیمان قائدانہ کڑد ادا کننگ کیک کبینی نا مون ءِ توننگ کن بنجا صوبہ غاتون اواری اٹ گام گیج کننگ ءِ ہرانا مثبت نتیجہ دوئی مننگ بناکرینے، پاکستان نا آخبت نا بارواٹ بھاز پرامید اُٹ۔ اوداہیتءِ تدوک آ نن ڈیجیٹل میڈیا پلیٹ فارم’’ ٹاک شاک‘‘ ءِ تروک آ انٹرویوٹی پارے۔ نگران وزیراعظم انوارالحق کاکڑ داخلہ و خارجہ امور، فلسطین نا جھیڑہ، کشمیر نا ویل اتون اوار اہم امور ءِ مون آتخا۔ اسہ پین سوج اسے نا ورندی ٹی وزیراعظم پارے کہ پاکستان ءِ داوخت آ زرگزرانی ، سیاسی و پین چیلنج مون تروک ءِ ہندا سوب آن دا بابت بحیثیت قوم ننا غٹ ءِ تینا کڑد ءِ ادا کروئی مریک۔ اوداہیت آ زور شاغا کہ گورننس نا سٹرکچر، سیاسی رویہ، مذہب وسیاست ، زرگزران و سیاست و عدلیہ نا نظام تون اوارایلو امور تیا دیانتدارانہ و آجو قومی ڈائیلاگ نا گرج ءِ۔ دارداٹ پارلیمان قائدانہ کڑد ادا کننگ کیک، اومیت ءِ کہ بروک آپارلیمان داڑآ کاریم کیک تانکہ اسہ صحت مند و شونہال راج اسے نا کنڈآ پیش گامی کننگ مرے۔ اوپارے کہ ملک اٹی بنداوپرستی یا انتہاپسندانہ رویہ نا ہچ ءُ گنجائشت اس اف ہراکہ داوڑ کیک ریاست اونا برخلاف کارروائی کیک۔ کبینی نا بابت اواسہ سوج اسے نا ورندی ٹی پارے کہ ننے ہروئی مریک کہ دانا سوب آک انت ءُ۔ داڑے خولم تون اوار اجناس بھلو کچ اسے ٹی دستیاب ءِ ولے کوڑی کننگ نا ویل مون آ بننگ ءِ، اونا برخلاف کارروائی نا بناءِ کرین تو بورہ نا نہاد آک کم مسر، داکاریم ضلعی حکومت آتا ءِ ولے بنجا صوبہ غاتون اواری اٹ گام گیج کننگ ءِ ہرانا مثبت نتیجہ دوئی مننگ بناکرینے۔ اوپارے کہ خصوصی سرمایہ کاری کونسل نا پلیٹ فارم آن سعودی عرب، متحدہ امارات تون اوار مچ آ دنیا غان معدنیات، آئی ٹی تون اوار ایلو بشخ آتیٹی ارب آ ڈالر نا زرکاری گمانی ءِ ، دا بابت دسمبر اٹی اہم خبر اس بننگ کیک۔ غیرکانودی پردیسی تا پیش تمنگ نا بابت اسہ سوج اسے نا ورندی ٹی اوپارے کہ رجسٹرڈ اوغان مہاجرآتے کشنگ نا ہچ ءُ ہیت اس کننگتنے، دابارواٹ تاثر اسُل غلط ءِ۔ ارٹ میکو کیٹیگری ہمو غیرکانودی درملکیک ءُ ہرافتے تون پاسپورٹ و ویزہ تون اوار ہچ ءُ کانودی دستاویز اس اف و راج اٹ اوفتا کڑد مبہم ءِ و او ننا نظام اٹ افس و بحیثیت ریاست نن خوانہ کہ اوفک پدی کار۔ اوفتا داڑے رہینگ انگ نا ہچ ءُ اخلاقی و کانودی سوب اس اف۔ دنیا نا ہر ریاست اوفتے کشنگ ءِ غیرکانودی یاغیراخلاقی تکپک ولے نن خوانہ کہ داوڑنا غیرکانودی درملکی تا پدی نا عمل اٹ اوفتا عزت نفس مجروح بایدے مف۔ مسٹ میکو کیٹگری ہموفتا ءِ ہرافک ننا راج انا کاہوت آتیٹی اوار مرسا جعلی دستاویز جوڑکرفیر، اوٹی ہم نظام نا غلط استعمال مسنے ، دادے ہم چٹفوئی ءِ و داوڑنا تا جانچ پڑتال ءِ کروئی ءِ۔ اسہ سوج اسے نا ورندی ٹی اوپارے کہ او پاکستان نا آخبت آن مایوس اف بلکن بھاز پرامید ءِ، سعودی عرب اٹی 15 آن 20 لکھ کسبکار پاکستانی تا کھپت نا وارخواہی ساڑی ءِ وخت اس کہ پاکستان آن افرادی قوت اونا اولیت ءِ داڑکن کسبکار افرادی قوت نا تیاری آ چکار کننگ اُن، مچ آملک اٹی جوڑ ووکیشنل ٹریننگ ادارہ غاتا ڈیٹایکجا کننگ اُن، دابارواٹی داہفتہ اہم ءُ دیوان اس مریک ۔ اسہ سوج اسے نا ورندی ٹی اوپارے کہ عمران خان نا رہائی نا فیصلہءِ عدالت ءِ کروئی ءِ اگہ عدالت اودے آزاد کیک تو او سیاسی عمل نا بشخ مریک۔ عدالت آک انت کہ فیصلہ اس کیرہ نگران حکومت اوڑا عملدرآمد نا پابند مریک۔
