اسلام آباد۔ 09 اکتوبر (اے پی پی) نگران وزیراعظم انوارالحق کاکڑ پارینے کہ حج کون آ اہم مذہبی فرض انا سرتننگ ءِ حاجی تیکن آسان و اڑزان کننگ کن پبی گام گیج کننگے، حاجی تیکن کروک آ بست وبند آتیا ہچ وڑنا سمجھوتہ کننگپ و کم خڑچہ ٹی گچین آسراتی تا فراوانی ءِ پک کننگے، نجی کمپنی تا سخت چاروکی کرسا دا پک کننگے کہ اوفتا توسط اٹ پرائیویٹ اسکیم نا رداٹ ہنوک آ حاجی تے ہم ہچ وڑنا مشکل پیش بف، حج پالیسی دمدستی وڑاٹ بنجائی کابینہ ءِ منظوری کن پیش کننگے۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ نگران وزیراعظم انوارالحق کاکڑ نا کماشی ٹی وزارت مذہبی امور نا دیوان اس اڈہلک۔ دیوان اٹی وزارت نا کارکڑد نا بابت سرجم حوال تننگا۔ وزیراعظم ءِ حج انا بابت گام گیج و حج پالیسی 2024 نا تیاری نا پیش رفت آن ہم معلومدار کننگا۔ دیوان اٹی بشخ ہلوک آتیان تران کرسا وزیراعظم پارے کہ حج کون آ اہم مذہبی فرض اناسرتننگ ءِ حاجی تیکن آسان و اڑزان جوڑ کننگ کن پبی گام گیج کننگے۔ اوپارت کرے کہ حاجی تیکن کروک آ بست وبند آتیا ہچ وڑنا سمجھوتہ کننگپ و کم خڑچ اٹی گچین آسراتی نا فراوانی ءِ پک کننگے۔ اومستی پارت کرے کہ نجی کمپنی تا سخت چاروکی ءِ کرسا دا پک کننگے کہ اوفتا توسط اٹ پرائیویٹ اسکیم نا رداٹ ہنوک آ حاجی تے ہم ہچ وڑنا مشکل پیش بف۔ وزیراعظم پارت کرے کہ حج پالیسی زوت بنجائی کابینہ ءِ منظوری کن پیش کننگے۔ دیوان اٹ نگران وزیر مذہبی امور انیق احمد، ایڈیشنل سیکرٹری وزارت مذہبی امور و تعلقدار کمامدارآک بشخ ہلکر۔
